8–10 qańtar aralyǵynda Qazaqstan aýmaǵynyń basym bóliginde aýa raiyna antitsiklon áser etedi. Osyǵan bailanysty eldiń kóp bóliginde jaýyn-shashynsyz aýa raiy kútiledi, dep habarlaidy Dalanews.kz.
Sinoptikterdiń boljamynsha, Qazaqstannyń batysy, soltústik-batysy jáne soltústigi atmosferalyq fronttardyń áserinde qalady. Bul óńirlerde jańbyr men qar túrindegi jaýyn-shashyn túsip, kóktaiǵaq bolýy múmkin. Eldiń soltústiginde qar jaýyp, tómengi boran soǵady dep boljanyp otyr. Respýblika boiynsha tuman túsip, jel kúsheiedi.
Aldaǵy kúnderi elimizdiń barlyq óńirinde aýa temperatýrasy birtindep joǵarylaidy:
Batysta túnde 8° aiaz – 5° jylymyqqa deiin, kúndiz 3° aiaz – 8° jylymyq;
Soltústik-batysta túnde 5–20° aiaz, kúndiz 8° aiaz – 1° jylymyq;
Soltústikte túnde 7–15° aiaz, kúndiz 2–10° aiaz;
Ortalyqta túnde 5–15° aiaz, kúndiz 0–6° aiaz;
Shyǵysta túnde 10–20° aiaz, kúndiz 2–13° aiaz;
Ońtústikte túnde 7° aiaz – 2° jylymyq, kúndiz 1–14° jylymyq;
Ońtústik-shyǵysta túnde 0–8° aiaz, taýly aimaqtarda 13–18° aiaz, kúndiz 3–12° jylymyq, taýly óńirlerde 3° aiaz – 2° jylymyq kútiledi.
Sinoptikter aýa raiynyń qubylmaly bolýyna bailanysty jolǵa shyǵatyn azamattardy saqtyq sharalaryn saqtaýǵa shaqyrady.
