Májilis depýtaty, Zańnama jáne sot-quqyqtyq reforma komitetiniń tóraiymy Snejanna Imasheva avtokólik júrgizýshileriniń jaǵyna shyqty. Depýtat Qazaqstanda kólikti 5 minýttan artyq qyzdyrýǵa tyiym salynǵany týraly pikir bildirdi. Onyń aitýynsha, kólikti “55 minýtqa deiin qyzdyrýǵa da bolady”. Bul týraly ol óziniń Facebook áleýmettik jelisinde aitty, dep habarlaidy Dalanews.kz.
Depýtattyń sózinshe, el arasynda qyzý talqyǵa túsken másele - kólikti 5 minýttan artyq qyzdyrýǵa bolmaidy degen ereje bul shyndyqqa janaspaidy.
"Jol qozǵalysy týraly" zań men jol qozǵalysy erejelerinde (JQE) mundai shekteýler kórsetilmegen. Bul túsiniktiń qaidan shyqqanyn anyqtap kórseteiin. "Jol qozǵalysy týraly" zańnyń 54-babynda kólik quraldarynyń ieleri men júrgizýshileriniń quqyqtary men mindetteri belgilengen. 4-tarmaǵynda júrgizýshilerge qoiylatyn tyiymdar bar", deidi depýtat.
Imashevanyń sózinshe, onyń ishinde mynalar atap ótilgen:
- Júrgizýshige eldi mekenderde qozǵaltqyshy qosýly kólikti turaqqa qoiýǵa bolmaidy (eger bul turǵyndarǵa qolaisyzdyq týdyrsa).
- Turǵyn aimaqtarda qozǵaltqyshy qosýly kólikti turaqqa qoiýǵa tyiym salynady (elektromobilderden basqa).
Turǵyn aimaq arnaiy belgimen belgilenedi jáne turǵyndardyń pikiri eskeriledi. Bul talap ta JQE-de de kórsetilgen.
Aita ketsek, turǵyn aimaqta qatty mýzyka tyńdaý nemese kólik signalyn qatty shyǵarýǵa da tyiym salynǵan.
5 minýt degen shekteý qaidan shyqty?
Bul «turaq» uǵymymen bailanysty.
"Zańǵa sáikes, jolaýshylardy otyrǵyzý nemese túsirý nemese kólik quralyn tieý nemese túsirýmen bailanysty emes sebeptermen kólik quralynyń qozǵalysyn bes minýttan astam ýaqytqa toqtap turý - turaq bolyp sanalady. Iaǵni, eger kólik 5 minýttan artyq toqtap tursa, bul turaq dep sanalady.Osy talaptar men shekteýler Qazaqstan Respýblikasynyń JQE-de kórsetilgen jáne olar uzaq ýaqyttan beri bar", deidi depýtat.
Ne eskerý qajet?
Eger sizdiń kóligińizdi qyzdyryp turýyńyz turǵyndarǵa qolaisyzdyq týǵyzbasa,bul ákimshilik quqyq buzýshylyq bolyp sanalmaidy.
"Biraq, eger siz úlken júk kóligi nemese traktormen turǵyn úi aýlasynda qatty shý shyǵaryp, tútindetip tursańyz, turǵyndar shaǵymdanýy múmkin. Mundai jaǵdaida ÁQBtK-niń 597-baby – kólik quraldaryn toqtatý nemese turaq erejelerin buzý áreket etedi. Osy bap boiynsha aiyppul mólsheri 5 ailyq eseptik kórsetkishti (AEK) quraidy", deidi depýtat Imasheva.
Qorytyndylai kele, eger siz adamdarǵa aitarlyqtai qolaisyzdyq týdyrmasańyz, kóligińizdi qalaǵanyńyzsha qyzdyryp tura alasyz.
