Uiym qujatty ázirlemes buryn áleýmettik zertteý júrgizip, birqatar túiitkildi anyqtaǵan. Aitalyq, áielderdiń jas ereksheligine qatysty genderlik kemsitýshilikti jan-jaqty zerdelepti.
Alians jetekshisi Raýshan Sársembaevanyń aitýynsha, 45 jastan asqan áielderdiń jumysqa ornalasýy qiyn. Al olardyń zeinetke shyǵýyna áli 20 jyl bar.
Uiymnyń saýalnamasyna jaýap bergen jumyssyz kelinshekterdiń 57 paiyzy dál osy sebepke bailanysty jumysqa ornalasa almai júrgenderin aitqan.
Jalpy Jol kartasy 7 baǵytty qamtydy. Onda áielderdiń quqyqtyq saýaty, jumyspen qamtý, meditsinalyq qyzmet, reprodýktivti densaýlyq, jas qyzdarǵa tárbie berý jumystaryn jolǵa qoiý qarastyrylǵan.
Sondai-aq Alians jergilikti basqarý organdarynda áielderdiń úlesin 50 protsentke jetkizýdi usynyp otyr.
«Qazaqstan áielder kúshteriniń aliansy» ZTB jetekshisi Raýshan Sársembaeva
– Jol kartasy áielder isi boiynsha qalalyq komissiiada qaraldy. Eldegi áielderdiń, atap aitqanda Almaty qalasynda turatyn azamatshalardyń jaǵdaiyn jaqsartýǵa Azamattyq qoǵamnyń beretin naqty usynystaryn jariialadyq. Uiym men Almaty qalasy ákimdigi arasynda kelisim bar. Qujatty qalalyq komissiiada bekitip, pilottyq joba retinde júzege asyra bastaimyz. Odan keiin aimaqtaǵy áielderdi qamtimyz, – dedi «Qazaqstan áielder kúshteriniń aliansy» ZTB jetekshisi Raýshan Sársembaeva.
