Búgin Túrkistan oblysy ákiminiń orynbasary Beisen Tájibaev bilekti azamatty qabyldap, jeńisimen quttyqtady.
– Siz týraly estip, saiystarda kórip júrmin. Jeńisińizben jáne Qazaqstan rekordtar kitabyna enýińizben shyn júrekten quttyqtaimyn! Qoshqar kóterý – qazaqtyń ulttyq sportynyń bir túri. Buqaralyq sporttyq saiystarǵa qatysyp, nasihattap kele jatqanyńyz úshin alǵys bildiremiz. Qoldaý kórsetken azamattardyń da úlesin atap ótken jón. Bul – eńbekpen ári tyńǵylyqty daiyndyqpen keletin jetistik. Osy baǵytta áli de oblysymyzdy tanytýǵa atsalysasyz degen senim mol, – dedi Beisen Dáýletuly.
37 jastaǵy Azamat Nurǵaliuly qurylys salasynda qyzmet etedi. Sporttyń birneshe túrimen ainalysady.
Qoshqar kóterý saiysyna qyzyǵýshylyǵy 2018 jyldan bastalyp, sol ýaqyttan beri shuǵyldanyp keledi. Aitýynsha, Qazaqstan boiynsha sońǵy rekord Almaty qalasynda tirkelgen.
Ol kezde qatysýshylardyń biri qoshqardy 2019 ret kótergen. Bul rekordty jańartqan batyr endi álemdik deńgeidegi saiystarda baq synaýdy josparlaýda. Shetelderde ótetin alyptar saiysyna daiyndalyp jatqanyn aityp, 5 myń ret mýliaj kóterý arqyly halyqaralyq deńgeide Giness rekordtar kitabyna enýdi kózdeýde. Sondai-aq, ózine demeýshilik kórsetken sport janashyry, Arys qalalyq máslihatynyń depýtaty Almas Shúkirbekovke rizashylyǵyn bildirdi.
Aita keteiik, 2023 jyldyń 28 mamyr kúni ótken sharaǵa Qazaqstan rekordtar kitabynyń (KInES) quryltaishysy Baqytjan Tastúlekov arnaiy qatysty. Qazaqstan rekordtar kitabynyń keiipkeri retinde engeni kýálik tabystady.
