بۇگىن تۇركىستان وبلىسى اكىمىنىڭ ورىنباسارى بەيسەن تاجىبايەۆ بىلەكتى ازاماتتى قابىلداپ، جەڭىسىمەن قۇتتىقتادى.
– ءسىز تۋرالى ەستىپ، سايىستاردا كورىپ ءجۇرمىن. جەڭىسىڭىزبەن جانە قازاقستان رەكوردتار كىتابىنا ەنۋىڭىزبەن شىن جۇرەكتەن قۇتتىقتايمىن! قوشقار كوتەرۋ – قازاقتىڭ ۇلتتىق سپورتىنىڭ ءبىر ءتۇرى. بۇقارالىق سپورتتىق سايىستارعا قاتىسىپ، ناسيحاتتاپ كەلە جاتقانىڭىز ءۇشىن العىس بىلدىرەمىز. قولداۋ كورسەتكەن ازاماتتاردىڭ دا ۇلەسىن اتاپ وتكەن ءجون. بۇل – ەڭبەكپەن ءارى تىڭعىلىقتى دايىندىقپەن كەلەتىن جەتىستىك. وسى باعىتتا ءالى دە وبلىسىمىزدى تانىتۋعا اتسالىساسىز دەگەن سەنىم مول، – دەدى بەيسەن داۋلەت ۇلى.
37 جاستاعى ازامات نۇرعالي ۇلى قۇرىلىس سالاسىندا قىزمەت ەتەدى. سپورتتىڭ بىرنەشە تۇرىمەن اينالىسادى.
قوشقار كوتەرۋ سايىسىنا قىزىعۋشىلىعى 2018 جىلدان باستالىپ، سول ۋاقىتتان بەرى شۇعىلدانىپ كەلەدى. ايتۋىنشا، قازاقستان بويىنشا سوڭعى رەكورد الماتى قالاسىندا تىركەلگەن.
ول كەزدە قاتىسۋشىلاردىڭ ءبىرى قوشقاردى 2019 رەت كوتەرگەن. بۇل رەكوردتى جاڭارتقان باتىر ەندى الەمدىك دەڭگەيدەگى سايىستاردا ب ا ق سىناۋدى جوسپارلاۋدا. شەتەلدەردە وتەتىن الىپتار سايىسىنا دايىندالىپ جاتقانىن ايتىپ، 5 مىڭ رەت مۋلياج كوتەرۋ ارقىلى حالىقارالىق دەڭگەيدە گينەسس رەكوردتار كىتابىنا ەنۋدى كوزدەۋدە. سونداي-اق، وزىنە دەمەۋشىلىك كورسەتكەن سپورت جاناشىرى، ارىس قالالىق ءماسليحاتىنىڭ دەپۋتاتى الماس شۇكىربەكوۆكە ريزاشىلىعىن ءبىلدىردى.
ايتا كەتەيىك، 2023 جىلدىڭ 28 مامىر كۇنى وتكەن شاراعا قازاقستان رەكوردتار كىتابىنىڭ (كينەس) قۇرىلتايشىسى باقىتجان تاستۇلەكوۆ ارنايى قاتىستى. قازاقستان رەكوردتار كىتابىنىڭ كەيىپكەرى رەتىندە ەنگەنى كۋالىك تابىستادى.
