Belgili qarjy sarapshysy Aibar Oljai 2GIS qosymshasyna boikot jariialaýdy usyndy. Dalanews.kz tilshisi sarapshymen sóilesip, mundai usynys jasaýynyń sebebin surady.
Ol qazaq halqyn PlayMarket nemese AppStore-de 2GIS qosymshasyna 1 juldyzsha baǵa qoiyp, reitingin tómendetý naýqanyn bastaýǵa shaqyrdy.
"Onyń sebebi, kompaniia qazaq tiliniń zańmen bekitilgen tutynýshylyq quqyǵy máselesinde ádeii kerisinshe áreketterge baryp júr. Olar Qazaqstanda jumys istegendikten, kafelerdi, qyzmet kórsetý oryndaryn jergilikti zań talaptaryn saqtaýǵa shaqyrýy tiis edi. Týgisten ondai jaýapkershilik baiqalmady. Demek kompaniia biznestiń áleýmettik jaýapkershilik printsipterin buzyp otyr. Ózi qyzmet etip, tabys taýyp otyrǵan eldiń tártibin, zań normalaryn saqtaýǵa qolǵabys etpeýine memlekettik organdar reaktsiia bermese, onda halyqqa boikot mehanizmderin iske qosýǵa týra keledi", - deidi Aibar Oljai.
Ol kompaniia osy máselege qatysty qandai sharalar qabyldaýy keregin aitty.
"Kompaniia óz tarapynan qoǵamdyq qyzmet kórsetý nysandarynyń zań talaptaryn saqtaýyna septesip, osy baǵyt boiynsha jaýapty jumys atqarýy tiis dep oilaimyn. Bul tájiribe áleýmettik jaýapkershiligi joǵary kompaniialarda buljytpas qaǵida", - deidi maman.
Biraq, sarapshynyń aitýynsha, 2GIS tutynýshy tildik baǵytta, mysaly qazaqsha as máziri joq degen shaǵym jasasa ony óshirýge tyrysady.
"Bul rette, tutynýshynyń shaǵymy zańdy ma degen prizmadan qaraý kerekpiz. Bul shaǵym zańdy, sebebi QR "Tilder týraly" Zańy men "Tutynýshylardyń quqyǵyn qorǵaý týraly" Zań buzylyp tur. Kompaniia kerisinshe ózi kartasyna belgilegen nysandarǵa osy boiynsha eskertý berýdiń ornyna, mundai shaǵymdardy jasyryp keledi", - deidi Aibar Oljai.
Sonymen qatar, maman bul jaǵdaida memlekettik organdar reaktsiia bermeitinin aitty.
"Buǵan memlekettik organdar reaktsiia bermegendikten, halyq bolyp birigip, osy karta qosymshasynyń reitingin túsirý arqyly problemaǵa nazar aýdarǵymyz keledi. Iaǵni, 2GIS esigin qaǵyp turmyz, problemany eskersin, osyny qaperge alsyn degen qadam jasaýdamyz", - deidi sarapshy.
Buǵan deiin qazaqstandyqtar qajet tilde qyzmet kórsetpegen birneshe kofehana men oryndarǵa boikot jariialaǵan bolatyn.
Mysaly biyl qańtarda Astanadaǵy Qazaq Coffee kofehanasy da daýly pikirden soń jabylǵan bolatyn. Sol kezde astanalyq turǵyn Qairat Ibraev kofehanadan qazaqsha mázir surap, bolmaǵan soń shaǵymyn 2GIS qosymshasyna jazǵan. Oǵan ákimshilik qyzmetkeri: "Qyzmetkerlerimiz qazaqsha sóileýge mindetti emes", – dep jaýap qatqan. Bul pikir qoǵamda úlken narazylyq týǵyzyp, áleýmettik jelide ult pen tilge degen qurmet máselesin qaita kótergen edi. Nátijesinde, Qazaq Coffee óz jumysyn toqtatty.
Sonymen qatar, kúni keshe Almaty qalasyndaǵy "Bratskii shashlyk" kafesine qatysty daý týdy.Kafe qazaqsha mázir suraǵan jigitti "natsist" dep qorlaǵan edi.
Oqiǵa 14 mamyr kúni bolǵan. Qala turǵyny Dosǵali Ámirov atalmysh kafede tamaqtanyp, mázirdiń qazaq tilinde usynylmaǵanyn aityp, 2GIS qosymshasynda pikir qaldyrǵan. Alaida mekeme ókili oǵan dóreki túrde jaýap bergen.
Pikirde: "Sen bárin túsinip tursyń ǵoi, nege aqymaq keipin tanytyp tursyń? Natsist, fashist. Eger pikirdi óshirmeseńder, qonaqtardy kútińder!" – degen sózder jazylǵan.
Osydan keiin kafe jaýabyn óshirip, tutynýshyny buǵattap tastaǵan.
Artynsha kafe ieleri áleýmettik jelide málimdeme jasady. Olar keshirim surap, ondai pikirlerdi kim jazǵanyn bilmeitinin alǵa tartty.
"Bizdiń atymyzdan kim jaýap berip jatqanyn bilmegenimizdi atap ótkimiz keledi. Biraq sizderge sendirgimiz keledi - bul jaǵdai bizdiń ustanymymyzǵa jáne qundylyqtarymyzǵa múlde sai kelmeidi. Biz qazaq tiline úlken qurmetpen qaraimyz jáne ony joǵary baǵalaimyz. Barsha qazaq halqynan shyn júrekten keshirim suraimyz. Biz Qazaqstandy, qazaq tilin jáne halqymyzdyń dástúrlerin shyn júrekten jaqsy kóremiz ári erekshe qadirleimiz. Qyzmetkerler arasyndaǵy túsinispeýshilikke bailanysty tiisti sharalar qoldanyldy, atalǵan qyzmetkerge tártiptik jaza qoldanyldy", - dedi kafe ieleri.
