Aqmolalyq turǵyn 24 jyl buryn jasalǵan qylmysy úshin sottaldy, dep habarlaidy Dalanews.kz.
Aqmola oblysynyń qylmystyq ister jónindegi mamandandyrylǵan aýdanaralyq sotynda 61 jastaǵy I.-ǵa qatysty áieldi zorlaý (kúsh qoldaný, óltiremin dep qorqytý arqyly) jáne asa qatygezdikpen adam óltirgeni úshin qylmystyq is qaraldy (1997 jylǵy redaktsiiadaǵy QK-niń 120-baby 2-bóliginiń «b»-tarmaǵy, 96-baby 2-bóliginiń «k»-tarmaǵy).
2002 jyly Aqkól qalasynda túngi ýaqytta 37 jastaǵy I. masań kúide avtokólikterdi toqtatyp, úiine jetpek bolǵan 29 jastaǵy A.-ny kezdestirgen. Ony uryp-soǵyp, óltiremin dep qorqytyp, jergilikti stadion aýmaǵyna alyp barǵan.
Jábirlenýshiniń denesine soqqy jasap, temekimen kúiik salý arqyly I. ony zorlaǵan, keiin jasaǵan qylmysyn jasyrý jáne jazadan jaltarý maqsatynda jábirlenýshini óltirgen.
Adam óltirýdi ol asa qatygezdikpen jasaǵan, jábirlenýshiniń aýzyna shyrsha búrshikteri men topyraq tyǵyp, keiin máiitti daladaǵy dárethanaǵa tastap, oqiǵa ornynan qashyp ketken. Saraptama qorytyndysyna sáikes, A.-nyń ólimi tynys alý joldarynyń bitelýi saldarynan bolǵan asfiksiiadan týyndaǵan.
I.-diń kinási kýálardyń aiǵaqtarymen, fotosýret boiynsha tanýmen, oqiǵa ornyn qaraýmen, saraptamalar qorytyndylarymen jáne istiń basqa da materialdarymen dáleldendi.
Jaza taǵaiyndaýda sot I.-diń buryn birneshe ret sottalǵanyn, qylmystyq jaýapkershilikke tartylǵanyn jáne asa aýyr qylmys jasaǵanyn eskerdi.
Sot úkimimen I.-ǵa 22 jylǵa bas bostandyǵynan aiyrý taǵaiyndaldy. Sondai-aq sottalǵannan jábirlenýshi taraptyń paidasyna 10 mln.teńge moraldyq ziian ótemaqysy óndirildi.
Sonymen qatar, I.-ǵa jazasyn óteý ornynda «alkogoldi tutynýmen bailanysty psihikalyq jáne minez-qulyqtyq buzylýlardan» májbúrli em taǵaiyndaldy.
Sot aktisi zańdy kúshine engen joq.
