2025 jyly Almaty indýstrialdy aimaǵynda 11 jańa joba iske qosylady

2025 jyly Almaty indýstrialdy aimaǵynda (AIA) jalpy investitsiia kólemi 135,5 mlrd teńge bolatyn 11 jańa jobany júzege asyrý josparlanyp otyr. Bul bastama 2 662 jańa jumys ornyn ashýǵa múmkindik beredi, dep habarlaidy Dalanews.kz 

Jańa kásiporyndardyń qatarynda 6 óndiristik nysan men 5 shaǵyn ónerkásiptik park (ShÓP) bar:

1. Astana Motors Manufacturing Kazakhstan – qytai brendteriniń jeńil avtomobilderin shyǵaratyn zaýyt;
2. Astana Motors Engineering – qoima kesheni;
3. ALTRA TYRES – avtokólik shinalaryn qaita óńdeý jáne rezeńke tehnikalyq buiymdar shyǵarý zaýyty;
4. BLACK BIOTECHNOLOGY – bioqospa men tyńaitqysh shyǵaratyn zaýyt;
5. Kapital Construction – armatýraly torlar men profildi qubyrlar óndirisi;
6. Baǵdar LTD – shyny ydystar shyǵaratyn zaýyt;
7. «ALAESTATE» – shaǵyn ónerkásiptik park;
8. «Bayterek-2050» – shaǵyn ónerkásiptik park;
9. «T and M company»  – shaǵyn ónerkásiptik park;
10. «Corporation M&A» – shaǵyn ónerkásiptik park;
11. «Baq Dáýlet» – shaǵyn ónerkásiptik park.

Bes shaǵyn ónerkásiptik parktiń qurylysyna 2,48 mlrd teńge bólindi. Jalpy aýdany 23 510 sharshy metr bolatyn bul nysandar 640 jumys ornyn ashady.

Sonymen qatar, Almaty qalasynda jalpy aýdany 140,2 myń sharshy metr bolatyn taǵy 24 shaǵyn ónerkásiptik park salynyp jatyr. Olardyń iske qosylýy 2025-2026 jyldarǵa josparlanǵan. Bul jobalarǵa 15,36 mlrd teńge investitsiia salynbaq, nátijesinde 3 125 jańa jumys orny ashylyp, 144 shaǵyn jáne orta biznes sýbektisi ornalastyrylady.

Qazir Almaty indýstrialdy aimaǵynda 107 kompaniia jumys isteidi. Olardyń jalpy investitsiia kólemi – 553,3 mlrd teńge, al ashylǵan jumys oryndar sany – 14 583. 2024 jyly AIA aýmaǵynda 13,4 mlrd teńge investitsiialanǵan 11 joba iske qosylyp, 977 adam jumyspen qamtyldy. 2016-2024 jyldar aralyǵynda jalpy somasy 142,1 mlrd teńge bolatyn 41 joba júzege asyrylyp, 4 430 jumys orny ashyldy. Osy kezeńde AIA kásiporyndary 2 524,4 mlrd teńgeniń ónimin shyǵaryp, 63,1 mlrd teńge salyq tóledi.

Almaty indýstrialdy aimaǵynyń damýy jalǵasyp, qala ekonomikasynyń ósýine jáne shaǵyn jáne orta biznesti qoldaýǵa úles qosyp keledi.