Aǵymdaǵy jyl Shyǵys Qazaqstanda jol, jol-kólik infraqurylymyn jetildirý jyly bolyp jariialandy, dep habarlaidy Dalanews.kz ShQO ákimdiginiń baspasóz qyzmetine silteme jasap.
Memleket basshysy Qasym-Jomart Toqaev jalpyulttyq quryltaida halyqaralyq sapa standarttaryna barynsha jaqyn avtojol jelisin jedeldetip qalyptastyrý qajettiligi týraly aityp, qazirgi jai-kúiine erekshe nazar aýdarǵan edi.
Aimaq pen tutastai eldiń damýy, halyqaralyq yntymaqtastyq, tiimdi kólik dálizderiniń keńeiýi, osynyń bári joldardyń jai-kúiine – ekonomikanyń ózindik qanainalym júiesine tikelei bailanysty deýge bolady.
Bul turǵyda respýblika óńirleri men kórshi memleketter arasyndaǵy bailanystyrýshy býyn sanalatyn Shyǵys Qazaqstan oblysynyń róli airyqsha mańyzǵa ie. ShQO infraqurylymynyń júk jáne jolaýshylar tasymalyn qamtamasyz etý úshin jalpy kólik jelisine sáikes kelý-kelmeýi seriktestiktiń keleshegine de áser eteri anyq.
Osyǵan orai, 2024 jyl Shyǵys Qazaqstan oblysynda «Jol jyly» bolyp jariialanǵan-dy.
Oblystyq ákimdikte ótken kezekti alqaly jiynda óńir basshylyǵy tapsyrmalarynyń oryndalý barysy, sondai-aq salalyq memlekettik baǵdarlamalardyń iske asyrylý jaiy talqylandy.
ShQO jolaýshylar kóligi jáne avtomobil joldary basqarmasynyń basshysy Nurjan Jumadilov oblysta jalpy somasy 28,5 milliard teńgeniń jobalary iske asyrylatynyn habarlady.
– Jol salasynyń áleýetin, kadrlardyń biliktiligin, qajetti tehnikamen qamtylýyn eskere otyryp, tiisti qarjylandyrý bolsa, bizde kózdelgen josparlar men jobalardy oryndaý úshin barlyq múmkindik bar ekenin aitqym keledi, – dep atap ótti Nurjan Jumadilov. – Jyldan jylǵa avtomobil jáne jolaýshylar tasymalynyń róli men mańyzy artyp keledi jáne bizdiń sala Qazaqstan ekonomikasynyń damýyna eleýli úles qosýda.
Basqarma basshysy 2023 jyly oblystyq jáne aýdandyq mańyzy bar 392 shaqyrym jol, sondai-aq eldi mekenderdiń kósheleri 20,4 milliard teńgege ortasha jóndeýmen qamtylǵanyn aitty. Al aǵymdaǵy jyly dál osyndai jumystarmen 600-den astam shaqyrym jol men eldi mekenderdiń kósheleri qamtylyp, bul maqsatqa 28,5 milliard teńge qarastyrylǵan eken.
