«Qazaqmys» korporatsiiasy Qaraǵaily baiytý fabrikasyn jańǵyrtý jáne óndiristik infraqurylymdy damytý jumystaryn jalǵastyryp jatyr, dep habarlaidy Dalanews.kz.
Kompaniianyń basqarma tóraǵasy Rýslan Óskenáli Qaraǵaily kentine jumys sapary barysynda kásiporynnyń óndiristik qyzmetimen tanysyp, tehnologiialyq jabdyqtardy jańartý jáne óndiristiń turaqty jumysyn qamtamasyz etýge baǵyttalǵan investitsiialyq jobalardyń júzege asyrylýyn talqylady.
Qaraǵaily baiytý fabrikasy Abyz, Aqbastaý jáne Qajyqonǵan ken oryndarynan óndiriletin polimetall kenin óńdeidi. Kásiporynnyń jyldyq óndiristik qýaty 1,4 mln tonna kendi quraidy. Munda mys jáne pirit kontsentrattary óndiriledi.
Sapar barysynda súzgileý ýchaskesine jańa jabdyq satyp alý, qaldyq sharýashylyǵyndaǵy qoiyrtpaq qubyrlaryn aýystyrý, aýyz sý júiesin jańǵyrtý jáne usaqtaý korpýsynyń qosalqy bólshektermen qamtamasyz etilýi siiaqty negizgi jobalar qaraldy. Kompaniianyń málimetinshe, bul sharalar jabdyqtardyń senimdiligin arttyryp, óndiristegi jospardan tys toqtap qalý táýekelderin azaitýǵa múmkindik beredi.
«Qaragayly Tau-ken ondirisi» filialynyń 2026 jylǵa arnalǵan investitsiialyq baǵdarlamasy aiasynda jabdyqtar, materialdar men qosalqy bólshekter satyp alýǵa 5,3 mlrd teńgeden astam qarjy bólingen. Onyń ishinde 3 mlrd teńgege jýyǵy Qaraǵaily baiytý fabrikasyna, al qalǵan qarajat Aqbastaý, Abyz jáne ózge kenishterdiń qajettilikterine baǵyttalady.
Investitsiialar súzgileý, usaqtaý jáne konveier júielerin jańǵyrtýǵa, qubyr jáne sorǵy infraqurylymyn, elektr jabdyqtaryn jańartýǵa, sondai-aq óndiristik protsestiń qaýipsizdigi men úzdiksiz jumysyn qamtamasyz etýge jumsalady.
Sonymen qatar kásiporynǵa qyzmet kórsetý úshin jańa tieý tehnikasyn satyp alý máselesi qarastyrylyp jatyr. Bul óndiristik jumystardy jedeldetip, jalǵa alynatyn tehnikanyń úlesin azaitýǵa múmkindik beredi.
Jumys sapary barysynda Rýslan Óskenáli Qarqaraly memlekettik ulttyq tabiǵi parkiniń aýmaǵynda ornalasqan «Sosnovyi bor» ýchaskesin de aralady. Ondaǵy turǵyn úiler men injenerlik jelilerdiń tehnikalyq jai-kúii baǵalanyp, olardy kezeń-kezeńimen jóndeý jáne jańǵyrtý josparlary talqylandy.
Kompaniia málimetinshe, Qaraǵaily baiytý fabrikasyn jańǵyrtý «Qazaqmys» tobynyń óndiristik aktivterdi kezeń-kezeńimen jańartý jáne eńbek jaǵdaiyn jaqsartýǵa baǵyttalǵan uzaq merzimdi investitsiialyq baǵdarlamasynyń bir bóligi bolyp tabylady.
