Jetisý oblysynda túrli etnos jastarynyń qatysýymen «Úzdik jas dombyrashy» oblystyq baiqaýy ótti. Jalpy, óńirdiń aýdan-qalalarynda Ulttyq dombyra kúnine arnalǵan 50-den astam is-shara ótkizý josparlanǵan. Sonyń ishinde shyǵarmashylyq baiqaýlar, kórmeler, ádebi-mýzykalyq keshter, tanymdyq jáne tárbielik synyp saǵattary, chellendjer, fleshmobtar, merekelik kontsertter bar, dep habarlaidy dalanews.kz.
Taldyqorǵanda ótken dombyrashylar baiqaýyn «Qoǵamdyq kelisim» KMM uiymdastyrdy. Baiqaýdyń negizgi maqsaty – túrli etnos ókilderi arasynda qazaqtyń ulttyq mádenieti men dástúrli mýzyka ónerin nasihattaý, óńirdiń mádeni imidjin arttyrýǵa yqpal etý, dombyrada sheber oryndaityn daryndy jas oryndaýshylardy anyqtap, olardyń shyǵarmashylyq áleýetin qoldaý.
Baiqaý barysynda qatysýshylar halyq kúileri men qazaqtyń dástúrli mýzyka óneriniń týyndylaryn oryndap, óz ónerlerin pash etti.
Baiqaýǵa qatysýshy Ershat Baiqadanuly:
– Men Qaratal aýdanynan keldim. Úshtóbe qalasyndaǵy Balalar shyǵarmashylyǵy ortalyǵynda dombyra synyby boiynsha bilim aldym. Dombyrany alǵash ret bala kúnimde kórip, osy ulttyq aspapqa degen qyzyǵýshylyǵym oiandy. Keiin atam maǵan dombyra syilaǵan soń, tegin úiirmelerge qatysa bastadym. Odan keiin mýzyka mektebine túsip, ustazym Janar Tutqabekovadan tálim aldym. Búgingi baiqaýda Qurmanǵazynyń «Adai» jáne Nurǵisa Tilendievtiń «Jekpe-jek» kúilerin oryndadym. Buǵan deiin de Shymkent, Atyraý qalalarynda jáne elimizdiń ózge óńirlerinde ótken dombyrashylar baiqaýlaryna qatystym, – dedi ol.
Qatysýshylardyń taǵy biri Sarqan aýdanynan kelgen Anastasiia Banahovich baiqaýǵa bir aiǵa jýyq ýaqyt daiyndalǵanyn aitady.
- Búgin ataqty kúishi-kompozitorlar Dáýletkereidiń «Qos alqa», Qurmanǵazynyń «Balbyraýyn» kúilerin shertemin. Mýzykalyq baiqaýlarǵa qatysqanda ony eń bastysy tájiribe almasý dep qabyldaimyn, men úshin jeńý emes, qatysý mańyzdy. Sarqan qalasyndaǵy Shyǵarmashylyq úiinde sabaq alǵan soń qazir tórt jyldai dombyra tartýdy úzbei jalǵastyryp, sheberligimdi jetildirip kelemin, - dedi jas dombyrashy.
Baiqaý qorytyndysy boiynsha úzdik oryndaýshylar dombyra beinesindegi statýetkamen, diplomdarmen, baǵaly syilyqtarmen, aqshalai syilyqtarmen marapattaldy.
Eske salsaq, oblys ortalyǵy Taldyqorǵanda 3 shilde kúni Ulttyq dombyra kúnine arnalǵan Dánesh Raqyshev atyndaǵy oblystyq filarmoniianyń mádeni-kópshilik baǵdarlamasy uiymdastyrylady. Osy merekelik sharada kórermenderge qazaqtyń dástúrli kúi óneri keńinen nasihattaldy.
