Qazaqstannyń úsh oblysynyń turǵyndaryna sel júrý qaýpine bailanysty eskertý jasaldy, dep habarlaidy dalanews.kz.
"Qazseldenqorǵaý" mekemesiniń málimetinshe, 3-5 shilde aralyǵynda Almaty, Jambyl oblystary men Jetisý oblysynyń taýly, taý bókterindegi aýdandarynda aptap ystyq pen nóser jaýyn qatar boljanyp otyr. Mundai aýa raiy taý betkeilerinen aǵyn kúsheiýine jáne ózenderdegi sý deńgeii kóterilýine sebep bolýy múmkin.
Mamandardyń aitýynsha, keibir aýmaqtarda sel júrý jáne kóshkin qaýpi saqtalady.
Aita keteiik, 1 shildede nóser jaýynnan keiin Almaty oblysynyń Qarasai jáne Eńbekshiqazaq aýdandaryndaǵy birneshe eldi mekendi sý basty. Sondai-aq, demalys aimaqtary da sý astynda qaldy.
