Qytaida eldegi 56 etnostyń birligi men qoǵamdyq kelisimdi nyǵaitýǵa baǵyttalǵan jańa zań kúshine endi, dep habarlaidy Dalanews.kz.
Qytai biliginiń málimetinshe, qujat biyl kóktemde ótken Jalpyqytailyq halyq ókilderi jinalysynyń eki sessiiasynda qabyldanǵan. Zań etnosaralyq qatynastardy quqyqtyq turǵydan retteýge, barlyq etnostardyń ortaq ulttyq biregeiligin nyǵaitýǵa jáne etnikalyq azshylyqtar turatyn óńirlerdiń áleýmettik-ekonomikalyq damýyn qoldaýǵa baǵyttalǵan.
Qujatta infraqurylymdy damytý, ónerkásiptik ósimdi yntalandyrý jáne óńirlerdiń ekonomikalyq áleýetin arttyrý boiynsha memlekettik qoldaý sharalary qarastyrylǵan.
Sonymen qatar Qytai AQSh pen Eýroodaqtyń jańa zańǵa qatysty synyn qabyldamaitynyn málimdedi. QHR Syrtqy ister ministrliginiń resmi ókili Go Tsziakýn Beijińniń ulttyq saiasatqa qatysty ishki isterine aralaspaýǵa shaqyrdy.
«Qytai – kópultty birtutas memleket. Eldegi barlyq etnostar teńdik, birlik, ózara kómek jáne kelisim qaǵidattaryna súiene otyryp ómir súredi. Ulttyq birlikke qatysty quqyqtyq bazany kúsheitý barlyq etnostardyń zańdy quqyqtary men múddelerin qorǵaýǵa yqpal etedi», – dedi ol.
Onyń aitýynsha, Qytai úkimeti ulttyq azshylyqtardyń mádenietin saqtaýǵa erekshe kóńil bólip, olardyń tilin qoldaný men damytý quqyqtaryn zań aiasynda qamtamasyz etedi.
Sonymen qatar resmi Beijiń keibir memleketterdi Qytaidyń ulttyq saiasatyna qatysty jalǵan aqparat taratyp, ishki isterge aralasty dep aiyptady.
Al Anadolu agenttigi Qytai biliginiń málimdemesine súiene otyryp, jańa zań halyqaralyq tájiribege sai ázirlengenin jáne qoǵamdyq kelisimdi, ulttyq birlikti ári áleýmettik turaqtylyqty nyǵaitýǵa baǵyttalǵanyn jazdy.
Qytaidyń Ádilet ministri Hý Veidiń aitýynsha, zań etnosaralyq arazdyq pen separatizmdi qozdyrýǵa baǵyttalǵan áreketter úshin jaýapkershilik qarastyrady. Sonymen birge onyń qoldanylýy halyqaralyq bailanystarǵa, ǵylymi yntymaqtastyqqa, mádeni almasýlarǵa nemese saýda-ekonomikalyq qatynastarǵa áser etpeitini atap ótilgen.
Al Jazeera basylymy da jańa zańnyń negizgi maqsaty memlekettik biregeilikti nyǵaitý, etnosaralyq ózara is-qimyldy damytý jáne ulttyq saiasat salasyndaǵy memlekettik ári qoǵamdyq institýttardyń jumysyn úilestirý ekenin jazdy.
Al Ózbekstannyń ulttyq Uza agenttigi qazirgi geosaiasi jaǵdaida ishki turaqtylyq pen ultaralyq kelisim árbir memleket úshin strategiialyq mańyzǵa ie ekenin atap ótti.
Osylaisha, jańa zań Qytaidyń etnosaralyq saiasattaǵy ustanymyn zańnamalyq deńgeide bekitip, ulttyq birlik pen áleýmettik turaqtylyqty qamtamasyz etýge baǵyttalǵan memlekettik strategiianyń mańyzdy bóligine ainaldy.
