Abai oblysyndaǵy Orlov shahtasynda jerasty liftiniń (klet) kúrt tejelýi saldarynan alty jumysshy zardap shekti. Bul aqparatty KAZ Minerals kompaniiasy rastady, dep habarlaidy dalanews.kz.
Oqiǵa 1 shilde kúni bolǵan. Sol sátte shahtadaǵy jerasty liftinde 15 adam bolǵan.
Kompaniianyń korporativtik bailanystar departamentiniń menedjeri Ermek Dúzkenevtiń aitýynsha, lift tómen túsip bara jatqan kezde onyń toqtatqysh mehanizmderiniń (kýlak) biri merziminen buryn iske qosylǵan.
«Klet tómen túsip kele jatqanda toqtatqyshtardyń bireýi ashylyp ketken. Qozǵalys kezinde lift sol toqtatqyshqa ilinip, birden toqtady. Sonyń saldarynan kúrt tejelý boldy», – dedi ol.
Oqiǵadan keiin alty adam dárigerlerdiń kómegine júgingen. Úsheýi jeńil jaraqat alyp, alǵashqy meditsinalyq kómekten keiin úilerine jiberildi. Taǵy úsh jumysshy Semei qalasyndaǵy aýrýhanaǵa jetkizilgenimen, keiin ambýlatorlyq em qabyldaý úshin shyǵarylǵan.
Qazirgi ýaqytta zardap shekken barlyq kenshi ambýlatorlyq em alyp jatyr.
Oqiǵanyń naqty sebebi ázirge anyqtalǵan joq. Kompaniianyń málimetinshe, oǵan tehnikalyq aqaý, adam faktory nemese ózge de sebepter áser etýi múmkin. Qazir oqiǵaǵa qatysty arnaiy komissiia men ónerkásiptik qaýipsizdik qyzmeti tekserý júrgizip jatyr. Qajet bolǵan jaǵdaida táýelsiz sarapshylar da tartylýy múmkin.
