Qazaqstandyqtardyń jeke deregi jańadan tarady degen aqparat shyndyqqa janaspaidy. Bul týraly Tsifrlyq damý, innovatsiialar jáne aeroǵarysh ónerkásibi ministri Jaslan Mádiev málimdedi, dep habarlaidy Dalanews.kz.
Onyń aitýynsha, jelide jariialanǵan derekter burynnan belgili bazalardyń jańartylǵan nusqasy ǵana bolýy múmkin.
“Qazaqstandyqtardyń jeke málimetteri qandai da bir Telegram-arnalarda paida bola qalsa, biz olardy dereý buǵattaimyz. Ras, keibir eski derekter jańartylǵan túrde qaita jariialandy. Biraq olardyń barlyǵy 2024 jyldyń 1 mamyryna deiingi kezeńge tiesili. Iaǵni, jańa aýqymdy aqparattyń taraýy tirkelgen joq”, — dedi ministr Májilis kýlýarynda ótken brifingte.iu
Buǵan deiin
Aita keteiik, 17 maýsym kúni Tsifrlyq damý, innovatsiialar jáne aeroǵarysh ónerkásibi ministrligi 16 million qazaqstandyqtyń jeke deregi tarady degen aqparatty tekserip jatqanyn habarlaǵan edi.
Bul kórsetkish el halqynyń basym bóligin qamtidy. Tarap ketken derekterde turǵyndardyń tegi, aty, ákesiniń aty, jynysy, týǵan kúni, JSN, meken jaiy, telefon nómirleri (uialy, úi jáne jumys telefondary), azamattyǵy, ulty jáne basqa málimetter kezdesedi.
Mamandardyń aitýynsha, bul derekter qalai taralǵany ázirge belgisiz. Buryn jariialanǵan málimetterdi jinaqtaý arqyly paida bolýy nemese bul múlde jańa oqiǵa bolýy múmkin. Keibir derekter jabyq Telegram arnalar arqyly satylyp ketýi de ǵajap emes.
Al ministrlik málimetinshe, azamattardyń jeke derekteri tarap ketkeni týraly aqparat tekserilip jatyr.
"Barlyq beiindi vedomstvo men qyzmetter jumyldyryldy. Jan-jaqty tekseris júrgizilip, sonyń ishinde derekterdiń ózektiligi tekserilip jatyr. Bastapqy taldaý jumystary derekterdiń kópshiligi eskirgenin kórsetti", - dedi ministrlik ókili.
Ministrlik málimdemesi
Keiin Tsifrlyq damý, innovatsiialar jáne aeroǵarysh ónerkásibi ministrligi qazaqstandyqtardyń jeke deregi tarap ketse, eGov-tan habarlama keletinin jetkizdi.
"Alǵashqy taldaý jumystary bul derekter memlekettik emes, jekemenshik júielerden alynýy múmkin ekenin kórsetip otyr. Memlekettik júielerden jeke derekter taraǵan joq, hakerlik shabýyldar saldarynan aqaý da tirkelgen joq", - dedi ministrlik ókilderi.
Vedomstvo málimetinshe, tekseris tolyq aiaqtalǵanǵa deiin qandai da bir qorytyndy jasaýǵa erte.
"Azamattyń jeke derekteri tarap ketken málimetter arasynda bolsa, bul týraly elektron úkimet portaly (eGov) arqyly jeke kabinetine habarlama joldanady", - dep jazylǵan málimette.
