Atyshýly eks-ministr Qýandyq Bishimbaevtyń isin qorǵaǵan advokat Nazken Qusaiynova eks- sheneýnikke taǵylǵan jaza merziminiń ádiletsiz ekenin aitty, dep habarlaidy Dalanews.kz.
«Tihii ýjas» YouTube arnasyna bergen suhbatynda advokat eks-ministrge taǵylǵan jaza merzimi týraly óz pikirin bildirdi.
«Úkim shyǵarylmas buryn, sýdia jaza merzimin aitqan kezde, appeliatsiiaǵa daiyndyq kezeńinde jáne jalpy alǵanda kóptegen advokat men tipti depýtattar da óz pikirlerin bildirdi. Osy iske qyzyǵýshylyǵy joq adamdar da qasaqana ólim bolmaǵanyn aitty. Ol jaǵdaida ary ketse QK-niń 106-babynyń 3-tarmaǵy boiynsha qarastyrylýy kerek edi. Al bul bap boiynsha densaýlyqqa qasaqana ziian keltirip, abaisyzda adam óltirý úshin kóbi 15 jylǵa bas bostandyǵynan aiyrý kózdelgen.
Bul isti alǵash qolǵa alǵan kezde Qýandyqtyń ózine de, onyń ata-anasyna da bul isten aqtalyp shyǵý múmkin emes ekenin aitqanmyn. Onyń jazaǵa tartylatynyn jáne adam ólimine sebepker bolǵanyn túsinýi kerek ekenin aittym. Degenmen, bul jaǵdaida qasaqana, naqty maqsatpen adam óltirý jospary bolmaǵanyn atap óttim», – dedi advokat.
Qusaiynova Bishimbaevtyń isinen áldeqaida aýyr jaǵdailar bolǵan basqa isterde jaza merziminiń az bolǵanyn atap ótti.
«Meniń oiymsha, ol 15 jyldan aspaýy kerek edi. QK-niń 106-baby boiynsha 8 jyldan 15 jylǵa deiingi aralyqta jaza taǵylǵan bolýy tiis edi. Bizdiń tapsyrǵan qujattarymyz boiynsha 12 jyl berýge bolatyn edi, tipti kóp degende 15 jyl. Biraq odan artyq bolmaýy kerek edi.
Bul is te basqa ister siiaqty qarastyrylýy tiis edi dep oilaimyn. Mysaly, áldeqaida aýyr jaǵdailarda, kúieýi áielin kórpege orap órtep jibergen, qulaǵyn kesip, ernin tigip tastaǵan siiaqty oqiǵalarda az merzimge sottalady. Bizde nege zań bir adamǵa basqasha, ekinshisine múldem basqasha qoldanylady? Bizde biryńǵai zań bolýy tiis. 24 jylǵa sottaý zańsyz jáne ádiletsiz boldy dep sanaimyn», – dedi Nazken Qusaiynova.
Aita keteiik, biyl 26 maýsymda Qýandyq Bishimbaev pen Baqytjan Baijanovqa qatysty qylmystyq istiń apelliatsiialyq sot otyrysy bolǵan edi. Alaida olardyń apelliatsiialyq ótinishi qanaǵattandyrylmady.
Qýandyq Bishimbaev 24 jylǵa, inisi Baqytjan Baijanov 4 jylǵa sottalǵan bolatyn.
Áielin óltirgeni úshin 24 jylǵa qamaýǵa alynǵan Qýandyq Bishimbaev eń joǵary qaýipsizdik mekemesinde jazasyn ótep jatyr.
Buǵan deiin QAJK ókilderi koloniiada eks-ministr úshin qolaily oryn áli bos emes ekenin, sondyqtan jumysqa turmaǵanyn málimdedi.
