Жаңа Конституцияның күшіне енуі мемлекет пен қоғам арасындағы ашық диалогты нығайтуға, сондай-ақ азаматтардың белсенді қоғамдық ұстанымын қалыптастыруға негіз болады. Бұл туралы Қазақстанның Қоғамдық даму институты Қоғамдық процестерді зерттеу орталығының қоғамдық процестерді зерделеу және болжау бөлімінің бас сарапшысы Инара Карибаева айтты, деп хабарлайды dalanews.kz.
Оның пікірінше, жаңа Негізгі заңның күшіне енуі мемлекетті одан әрі дамыту және азаматтық қоғамның рөлін күшейту тұрғысынан маңызды қадам.
«Менің ойымша, жаңа Конституция мемлекет пен қоғамды одан әрі дамыту үшін маңызды негіз қалыптастырады. Әсіресе конституциялық өзгерістердің өзегінде адамның, оның құқықтары мен қадір-қасиетінің, сондай-ақ ел өміріне қатысу мүмкіндігінің қалуы маңызды. Бұл азаматтардың белсенді қоғамдық ұстанымын қалыптастыруға жол ашады. Яғни халық өзін мемлекеттік қызметтерді жай ғана алушы ретінде емес, қоғамдық процестердің толыққанды қатысушысы ретінде қабылдай бастайды», – деді Инара Карибаева.
Сарапшының айтуынша, жаңа Конституция қоғамдық диалог жүргізу және азаматтарды маңызды шешімдерді қабылдау процесіне тарту мүмкіндігін кеңейтеді.
«Азаматтық қоғам үшін жаңа Конституция диалог кеңістігін кеңейтіп, қоғамдық қатысудың маңызын арттырады. Қазақстан Халық Кеңесінің құрылуы мемлекет пен халықтың түрлі топтары, өңірлер және азаматтық қоғам институттары арасындағы байланысты нығайтатын маңызды тетікке айналуы мүмкін. Мұндай алаң әртүрлі пікірлерді біріктіруге, қоғам үшін маңызды мәселелерді талқылауға және ел дамуының басымдықтары жөнінде ортақ түсінік қалыптастыруға мүмкіндік береді», – деді ол.
Инара Карибаеваның пікірінше, жаңа Конституцияның басты құндылығы – мемлекет пен қоғам арасындағы өзара байланысты күшейту.
«Жалпы, жаңа Конституция неғұрлым ашық, әділетті әрі адамға бағдарланған мемлекет құруға негіз қалыптастырады. Оның маңызы – елдің дамуы енді мемлекеттік институттардың тиімділігімен ғана емес, азаматтардың белсенділігімен, қоғамдық диалогтың сапасымен және Қазақстанның болашағы үшін мемлекет пен қоғамның ортақ жауапкершілігімен де тығыз байланысты бола түсетінінде», – деп қорытындылады сарапшы.
