ҚР қаржы вице-министрі Ержан Біржанов Қостанай облысының бизнес-қоғамдастығымен кездесу өткізді, онда салық реформасы талқыланды. Кездесуге экономиканың түрлі саласында жұмыс істейтін кәсіпкерлер мен өңірдің 8 салалық кеңесінің мүшелері қатысты, деп хабарлайды Dalanews.kz.
Вице-министр Қазақстандағы ҚҚС мөлшері әлемдегі ең төмендерінің бірі екенін атап өтті, сондай-ақ ҚҚС төлеушілер шеңберін кеңейту бизнес үшін тең бәсекелестік жағдайларды қалыптастыруға мүмкіндік береді.
Салық реформасындағы өзгерістер бүкіл халықтың мүддесіне әсер ететіндіктен, қазіргі уақытта бизнес-сарапшылардың қатысуымен белсенді талқылау жүргізіліп жатыр. Қостанайлық кәсіпкерлер салық реформасына ұтымды әрі теңгерімді көзқарас қалыптастыру үшін жергілікті деңгейде конструктивті диалогтың маңыздылығын атап өтті.
Талқылау барысында көтерілген негізгі мәселелердің бірі – ҚҚС мөлшерлемесін өзгерту болды. Облыстық Құрылысшылар қауымдастығының атқарушы директоры Ирина Викулова құрылыс саласы бойынша құрылыс компаниялары мен жобалаушыларға салықтың сараланған тәсілін қолдану қажеттігін атап өтті.
Сондай-ақ кәсіпкерлер құрылыс саласын қолдау шараларын, оның ішінде екінші деңгейлі банктерде несиелер бойынша жеңілдетілген мөлшерлемелерді қарастыру мүмкіндігін талқылауды сұрады.
Сауда саласының өкілдері бизнесті шағын, орта және ірі санаттарға бөлуге қатысты тағы бір маңызды ұсыныс енгізді. Бұл ұсынысты "Новь LTD" ЖШС директоры Наталья Лапшина жеткізді.
"Өкінішке қарай, бұл жіктеу қазіргі экономикалық жағдайды толықтай көрсетпейді және кәсіпкерліктің дамуына кедергі келтіреді. Мысал ретінде көтерме және бөлшек сауда кәсіпорындарын айтуға болады. Олар экономиканың дамуы мен жұмыс орындарын құруға елеулі үлес қосқанына қарамастан, өнеркәсіптік алпауыттармен бірдей "ірі компаниялар" санатына жатқызылады. Алайда мұндай кәсіпорындардың табысы жылдық жиынтық кірістің небәрі 5-10%-ынан аспайды", — деп атап өтті Наталья Лапшина.
Сауда өкілдері орта және ірі бизнес үшін шекті мәнді арттыру бойынша ұсыныстар енгізді.
Сонымен қатар кәсіпкерлер құқық бұзушылықтың ауырлығы мен бизнес көлеміне қарай айыппұлдарды саралау жөнінде ұсыныс айтты.
Қазақстанның Жұмыртқа өндірушілер қауымдастығының президенті Қайрат Маишев агроөнеркәсіптік кешен ел экономикасының негізгі салаларының бірі екенін және салық заңнамасындағы кез келген өзгерістер оның дамуына тікелей әсер ететінін айтты. Жаңа салықтық бастамалар аграршыларды өсім, жаңғырту және бәсекеге қабілеттілігін арттыруға қосымша ынталандыра алады.
Кеңес барысында кәсіпкерлер өздерін алаңдатқан сұрақтарын қойып, салық саясатына кез келген өзгеріс енгізу кезінде бизнес-қоғамдастықтың пікірін ескеру қажеттігін ерекше атап өтті. Өз кезегінде Үкімет барлық ұсынысты жан-жақты зерттеп, мұқият қарастыратынын жеткізді.
