Базалық мөлшерлеме екі рет төмендетілгеннен кейін теңгенің болашағы туралы пікірталас қайта жанданды. Алайда ұлттық валютаның бағамы тек Ұлттық банктің шешімдеріне ғана тәуелді емес. Оған бір мезгілде мұнай бағасы, инфляция, Ұлттық қордың операциялары, импорт көлемі, әлемдік экономикалық ахуал және нарық қатысушыларының күтулері әсер етеді.
Осы факторлардың қайсысы екінші жартыжылдықта шешуші болуы мүмкін және жыл соңына дейін теңге бағамынан не күтуге болады? Бұл туралы Qazaq Expert Club сарапшысы, қаржыгер Саида Тлеуленова түсіндірді, деп хабарлайды dalanews.kz.
Сарапшының пікірінше, теңгені соңғы айларда қатаң ақша-кредит саясаты, инфляцияның баяулауы, Ұлттық қор операциялары және валюта нарығындағы тұрақты жағдай қолдап отыр. Маусымда инфляция 10,3%-ға дейін төмендеген.
Сонымен қатар жылдың екінші жартысында импорттың артуы мен шетел валютасына сұраныстың көбеюі теңгеге қысым түсіруі мүмкін. Егер мұнай бағасы да төмендесе, ұлттық валюта біртіндеп әлсіреуі ықтимал.
Қаржыгердің бағалауынша, ең ықтимал сценарий бойынша жыл соңына қарай доллар бағамы 475–495 теңге аралығында қалыптасады. Ал мұнай бағасы өсіп, инфляция баяуласа, бағам 465–480 теңге деңгейінде болуы мүмкін.
Тәуекел сценарийінде, яғни мұнай бағасы айтарлықтай төмендеп, сыртқы экономикалық жағдай нашарлаған жағдайда доллар бағамы 500 теңгеден асуы ықтимал. Дегенмен сарапшы мұндай нұсқаның ықтималдығы төмен екенін атап өтті.
Саида Тлеуленова бизнес пен инвесторлар үшін бағамның нақты деңгейінен гөрі оның тұрақтылығы мен болжамдылығы маңызды екенін айтты. Оның сөзінше, қазіргі жағдайда күрт девальвациядан гөрі теңгенің біртіндеп өзгеруі әлдеқайда ықтимал сценарий болып отыр.
