Қазақстанда әлеуметтік төлемдерді заңсыз алу үшін қолданылған жалған еңбек қатынастарының ауқымды схемалары анықталды. Тексеру қорытындысы бойынша елдің бірнеше өңірінде қылмыстық істер қозғалды, деп хабарлайды dalanews.kz.
Мемлекеттік әлеуметтік сақтандыру қоры жүргізген мониторинг барысында азаматтардың міндетті әлеуметтік сақтандыру жүйесіндегі талаптарды айналып өту үшін жалған жұмысқа орналасу фактілері анықталған. Ведомство мәліметінше, мұндай схемалар арқылы азаматтардың табысы қолдан көтеріліп көрсетілген. Соның нәтижесінде әлеуметтік төлемдерді заңсыз алуға мүмкіндік туған.
4 мыңнан астам адам күмәнді еңбек қатынастарына тартылған
Қор дерегіне сәйкес, мұндай схемаларға қатысы бар 258 кәсіпкерлік субъектісі анықталған. Сонымен қатар 4,4 мыңнан астам азамат жалған еңбек қатынастарына тартылғаны белгілі болды.
13 өңірде қылмыстық істер қозғалды
Қазіргі уақытта елдің 13 өңірінде 38 қылмыстық іс қозғалған. Оның ішінде тоғыз іс бойынша сот үкімі шығып үлгерген. Соттар Ақтөбе, Маңғыстау, Қызылорда және Шығыс Қазақстан облыстарындағы схемаларды ұйымдастырған 12 адамды кінәлі деп таныды.
Сотталғандарға 3 жылдан 5 жылға дейін бас бостандығынан айыру жазасы тағайындалған.
Цифрлық бақылау күшейтіліп жатыр
Ведомство өкілдерінің айтуынша, әлеуметтік-еңбек саласын цифрландыру күмәнді операцияларды ерте кезеңде анықтауға мүмкіндік беріп отыр. Қазір жүйеде деректер нақты уақыт режимінде салыстырылып, тексеріледі. Бұл әлеуметтік төлемдерді заңсыз алу әрекеттерін жедел анықтауға көмектеседі.
