Qazaqstanda áleýmettik tólemderdi zańsyz alý úshin qoldanylǵan jalǵan eńbek qatynastarynyń aýqymdy shemalary anyqtaldy. Tekserý qorytyndysy boiynsha eldiń birneshe óńirinde qylmystyq ister qozǵaldy, dep habarlaidy dalanews.kz.
Memlekettik áleýmettik saqtandyrý qory júrgizgen monitoring barysynda azamattardyń mindetti áleýmettik saqtandyrý júiesindegi talaptardy ainalyp ótý úshin jalǵan jumysqa ornalasý faktileri anyqtalǵan. Vedomstvo málimetinshe, mundai shemalar arqyly azamattardyń tabysy qoldan kóterilip kórsetilgen. Sonyń nátijesinde áleýmettik tólemderdi zańsyz alýǵa múmkindik týǵan.
4 myńnan astam adam kúmándi eńbek qatynastaryna tartylǵan
Qor deregine sáikes, mundai shemalarǵa qatysy bar 258 kásipkerlik sýbektisi anyqtalǵan. Sonymen qatar 4,4 myńnan astam azamat jalǵan eńbek qatynastaryna tartylǵany belgili boldy.
13 óńirde qylmystyq ister qozǵaldy
Qazirgi ýaqytta eldiń 13 óńirinde 38 qylmystyq is qozǵalǵan. Onyń ishinde toǵyz is boiynsha sot úkimi shyǵyp úlgergen. Sottar Aqtóbe, Mańǵystaý, Qyzylorda jáne Shyǵys Qazaqstan oblystaryndaǵy shemalardy uiymdastyrǵan 12 adamdy kináli dep tanydy.
Sottalǵandarǵa 3 jyldan 5 jylǵa deiin bas bostandyǵynan aiyrý jazasy taǵaiyndalǵan.
Tsifrlyq baqylaý kúsheitilip jatyr
Vedomstvo ókilderiniń aitýynsha, áleýmettik-eńbek salasyn tsifrlandyrý kúmándi operatsiialardy erte kezeńde anyqtaýǵa múmkindik berip otyr. Qazir júiede derekter naqty ýaqyt rejiminde salystyrylyp, tekseriledi. Bul áleýmettik tólemderdi zańsyz alý áreketterin jedel anyqtaýǵa kómektesedi.
