Қазақстанда несие беру қағидаларын қатаңдату туралы жоспар жүзеге аспайды. Ұлттық банк бұған дейін ұсынылған бірқатар өзгерістерді енгізуден бас тартты, деп хабарлайды dalanews.kz.
Атап айтқанда, реттеуші қарыз алушының жалпы берешегі оның сегіз жылдық табысынан аспауын көздейтін жаңа қарыз бен табыс арақатынасы коэффициентін енгізбейтін болды.
Сондай-ақ, төлем мерзімін өткізіп алған азаматтар үшін борыштық жүктеме коэффициентін төмендету туралы бастама да күшін жойды.
Дегенмен ипотекалық несиелеу саласында өзгерістер енгізіледі. 2027 жылдың 1 қаңтарынан бастап ипотеканың жылдық тиімді сыйақы мөлшерлемесінің ең жоғары шегі бастапқы жарнаның көлеміне байланысты белгіленеді.
Егер бастапқы жарна тұрғын үй құнының кемінде 30%-ын құраса, онда жылдық тиімді сыйақы мөлшерлемесі 20%-дан аспайды. Ал бастапқы жарна 30%-дан аз болған жағдайда ең жоғары мөлшерлеме 25%-ға дейін жетуі мүмкін.
Осылайша, Қазақстанда несие беру талаптары жалпы алғанда қатаңдатылмайды. Алайда ипотекалық несиелердің шарттары бастапқы жарна мөлшеріне қарай сараланып белгіленетін болады.
