Қазақстан Сыртқы істер министрлігі Ресей тарапының жаңа кіру ережелеріне қатысты сұрақтарына жауап берді. Ведомствоның мәліметінше, QazETA электронды рұқсат беру жүйесі визасыз режим қолданылатын 85 елдің азаматтарына, соның ішінде Ресей азаматтарына да қатысты болады, деп хабарлайды dalanews.kz.
Қазақстан СІМ мәліметінше, жаңа тәртіпке қатысты қажетті ақпарат Мәскеуге ресми дипломатиялық арналар арқылы жеткізілген.
Министрлік қосымша түсініктемелерді шетелдегі Қазақстанның дипломатиялық өкілдіктерінің сайттарында алдын ала жариялауды жоспарлап отыр. Сонымен қатар Астанада шет мемлекеттердің дипломатиялық миссияларына арналған арнайы брифинг өткізу көзделген.
Бұл мәлімдеме Ресей Сыртқы істер министрлігінің ресми өкілі Мария Захарованың жаңа кіру ережелеріне қатысты қосымша түсініктеме сұрауына жауап ретінде жасалды.
Еске салайық, Қазақстан визасыз режим қолданылатын шетел азаматтарына арналған QazETA электронды рұқсат беру жүйесін енгізуді жоспарлап отыр. Жаңа жүйенің талаптары мен оны қолдану тәртібі туралы толық ақпарат ресми ресурстарда жарияланады.
Айта кетейік, Ресей Қазақстаннан визасыз шетел азаматтарына арналған электронды рұқсат беру жүйесін енгізу тәртібіне қатысты түсініктеме сұраған болатын.
