Әл-Фараби атындағы Қазақ ұлттық университетінің оқытушысы Гаухар Дүйсембиева жұмыстан шығару кезінде заңбұзушылықтарға жол берілгенін мәлімдеді. Оның сөзінше, бұйрық өткен күнмен рәсімделіп, құжаттардағы қолдар қолдан жасалған. Оқытушы бұған дейін өзіне дене жарақаты салынғанын да айтты. Университет басшылығы тағылған айыптарды жоққа шығарып, еңбек шартының бұзылуына оқытушының тәртіп пен педагогикалық әдеп талаптарын сақтамауы себеп болғанын алға тартты, деп хабарлайды dalanews.kz newtimes.kz-ке сілтеме жасап.
Жұмыстан шығару туралы бұйрық сабақ үстінде көрсетілген
Гаухар Дүйсембиеваның айтуынша, университет өкілдері сабақ жүріп жатқан кезде аудиторияға кіріп, студенттердің көзінше оның жұмыстан шығарылғанын хабарлаған. Оқытушыға көрсетілген бұйрық 2 қазанмен рәсімделгенімен, құжаттың өзін оған тек 7 қазанда табыстаған.
Әлеуметтік желіде тараған видеода Дүйсембиева бұйрықтың өткен күнмен жазылғанын айтып, бірқатар құжаттағы қолдар қолдан жасалған болуы мүмкін деген күдігін білдіреді. Ол бұрын университет қабырғасында өзіне дене жарақаты салынғанын да мәлімдеген.
ҚазҰУ оқытушыны не үшін жұмыстан шығарғанын түсіндірді
Университет әкімшілігі Гаухар Дүйсембиевамен еңбек қатынасы еңбек тәртібі мен педагогикалық әдепке қатысты материалдар қаралғаннан кейін тоқтатылғанын хабарлады.
ҚазҰУ нұсқасы бойынша, оқытушы студенттерді, оның ішінде кәмелетке толмағандарды оқу үдерісіне қатысы жоқ жеке мәселелеріне араластырған. Атап айтқанда, университет Дүйсембиева студенттерден әлеуметтік желідегі жазбаларына пікір қалдырып, қоғамдық пікірге ықпал етуді сұраған деп мәлімдеді.
"Студенттер оқу нәтижесін тікелей бағалайтын оқытушыға академиялық тұрғыда тәуелді. Мұндай жағдайда оларды ұстаздың жеке дауына араластыру кәсіби педагогикалық әдеп қағидаларына қайшы келеді", – делінген университет түсініктемесінде.
ҚазҰУ өкілдері оқытушының студенттер қол қойған құжатты өзінің еңбек дауына дәлел ретінде пайдаланғанын да сынға алды. Әкімшіліктің пікірінше, бұл құжаттың мазмұны күмән туғызады.
Университет бұйрықтың сабақ үстінде табысталғанын жоққа шығарды
ҚазҰУ 2 қазанда жұмыстан шығару туралы бұйрық шыққанын растады. Университет мәліметінше, мұндай шешімді тәртіптік комиссия қабылдаған. Оқытушыға комиссия отырысы туралы алдын ала хабарланып, өз ұстанымын түсіндіруге мүмкіндік берілгенімен, ол отырысқа келмеген.
Бұйрықтың көшірмесі Дүйсембиеваның тұрғылықты мекенжайына EMS Qazpost арқылы заңда белгіленген мерзімде жіберілгені айтылды. Әкімшілік 7 қазанға қарай оның университет қызметкері болмағанын мәлімдеді.
ҚазҰУ нұсқасына сәйкес, кафедра меңгерушісі сабақ тоқтап қалмауы үшін басқа оқытушыны тағайындаған. Алайда Дүйсембиева аудиторияға өзі келіп, оны алмастырған маманнан бөлмеден шығуын талап етіп, сабақты жүргізе бастаған. Кейін келген кадр бөлімінің қызметкері мәселені дәлізде талқылауды ұсынғанымен, оқытушы әңгімені студенттердің алдында жалғастыруды талап еткен.
"Университет кадрлық құжаттарды сабақ кезінде көпшілік алдында тапсыруға бастама көтерген жоқ. Бұл жағдай еңбек қатынасы тоқтағаннан кейін бұрынғы оқытушының өз бетінше сабақ өткізуге кірісуінен туындады", – деп түсіндірді ҚазҰУ.
Соққы мен қолды қолдан жасау туралы мәлімдемеге не деді?
Гаухар Дүйсембиева айтқан дене жарақаты мен қолдарды қолдан жасауға қатысты айыптар да жауапсыз қалған жоқ. Университет бұл оқиғалардың 2023–2024 жылдары болғанын және 2026 жылғы қазандағы жұмыстан шығаруға қатысы жоқ екенін мәлімдеді.
ҚазҰУ мәліметінше, дене жарақатына қатысты жағдай екі қызметкер арасындағы жеке жанжалдан туындаған. Бұл істі құқық қорғау органдары қараған. Ал қолдарды қолдан жасау туралы мәселе сотта зерттелген.
"Аталған мәлімдемелер 2023–2024 жылдардағы оқиғаларға қатысты және Г.М. Дүйсембиевамен еңбек қатынасының 2026 жылғы қазанда тоқтатылу жағдайына қатысы жоқ", – деп атап өтті университет.
