Алматыдағы қонақүйді сатып алу-сату туралы мәмілені Қайрат Сатыбалды Астана қаласының тергеу изоляторында жасағаны белгілі болды, деп хабарлайды Dalanews.kz Ulysmediа.kz-ке сілтеп.
Астанада өткен баспасөз мәслихатында жеке компания басшысы Асқар Өтешов Алматыдағы қонақүйді рейдерлердің басып алуы туралы айтты.
"Жаңа Қазақстанда 20 жыл бұрын жасалған қылмыстарға тосқауыл қоюымыз қажет. 2018 жылы ЖШС (Өтешов ұсынған тұлғаның компаниясы) Алматы қаласындағы қонақ үй кешенінің құрылысын аяқтау үшін банктен (Капитал банк) несие алды. Құрылыс аяқталғаннан кейін ЖШС несиені толығымен қайтарды. Өкінішке қарай, банк кейінге қалдыру құқығын бермей, несиені толық өтеуді талап етті. Осыдан кейін банк істі коллекторлық агенттікке беріп, келісім жасайды. Осы жерде қайдан екенін белгісіз "Қазаэронавигация" мекемесі пайда болады. Мемлекеттік кәсіпорын 14 миллиардқа жуық бюджет қаражатын банк шоттарына орналастырғаны белгілі болды. Банктегі жағдай нашарлай бастаған соң, компания басшысы ақшаны қайтарып беруді сұраған. Ақша қайтарылмаған.
Қылмысты жасыру үшін банк шарт жасасып, оны азаматтық-құқықтық мәміле ретінде жасырады. Коллекторлар аукциондар жариялайды. Олар жарамсыз деп танылады. Содан кейін ол компанияның мүлкін қауіпсіз түрде өз меншігіне алады. Бір айдан кейін Қайрат Сатыбалдыға қарасты компанияға сатады. Осыдан кейін 2021 жылдың желтоқсан айында Сатыбалды қонақүйге бірнеше адаммен келіп, қонақүйді қоршап алады. Директорға барып, орталық серверлерді өшіреді. Осыдан кейін ғимаратты тінту басталады. Ол бар дауысымен "бұл біздің кафе, бұл біздің бар" деп айтады. Ал қонақүй қызметкерлеріне: қалай жұмыс істеп келсеңдер, солай жұмыстарыңды жалғастырыңдар. Қонақүйдің тек иесі ауысады деп ескертеді", - деді Өтешов.
Содан кейін АФМ-ге рейдерлерді басып алу туралы мәлімдеме жазылды. 2022 жылы қылмыстық іс қозғалды.
"Бұл жағдай 11 ай бойы тексерілді. Осы уақыт ішінде менің клиентім жәбірленуші ретінде танылды. Қонақ үй 11 миллиардқа бағаланады. Коллектор бұған дейін 5 миллиардқа, ал банк 9 миллиардқа бағалаған.
Тергеу барысында мүлікке тыйым салу туралы өтініш берілді. Нәтижесінде Алматы полиция департаментінің тергеушісі жылжымалы және жылжымайтын мүлікке қатысты барлық операцияны тоқтату туралы қаулы шығарды. Біраз уақыттан кейін тергеушінің шешімінің күшін жою туралы хат келеді.
Осы оқиғадан кейін Қайрат Сатыбалды "Қазақтелеком" ісі бойынша ұрлық жасағаны үшін сотталады. Ол кезде үкім заңды күшіне енген болатын. Сатыбалды Астанадағы тергеу изоляторында болған. Оның үстіне бір күні тергеу изоляторына нотариус келіп, Сатыбалды мен оның сенімді өкілдеріне мәміле жасау құқығын беретін сенімхатты куәландырады. Содан кейін Сатыбалды қонақүйді сатып алып, кейін оны мемлекетке сыйға тартатын келісім-шарт жасалады. Үкім заңды күшіне енген кезде тергеушілер мүлікті, соның ішінде қонақүйді тәркілеуге береді. Сатыбалды "қонақүйдің заңды иесі" атанып, оны мемлекетке табыстайды", - деді Өтешов.
Айта кетейік, өткен жылы Қайрат Сатыбалды қамауда отырғанда сәнді қонақүй сатып алғаны белгілі болды. Кейінірек Антикор жағдайға қатысты пікір білдірді.
