Премьер-министр қызметінде қалған Олжас Бектенов жыл соңына қарай Қазақстан экономикасының өсімі кемінде 5 пайыз деңгейінде болатынын мәлімдеді, деп хабарлайды dalanews.kz.
Ол бұл туралы Президент Қасым-Жомарт Тоқаевтың қатысуымен өткен жиында айтты.
– Құрметті Президент мырза, жыл қорытындысы бойынша біз экономиканың кемінде 5 пайыздық өсімін қамтамасыз етеміз. Осыған байланысты инфляция деңгейін төмендетіп, халықтың табысын арттыру үшін жұмыспен қамтуды белсенді түрде ынталандыратын боламыз, – деді Олжас Бектенов.
Премьер-министрдің айтуынша, Үкімет алдағы уақытта экономикалық өсімді сақтауға, инфляцияны тежеуге және азаматтардың әл-ауқатын жақсартуға бағытталған шараларды жалғастырады.
Бектенов сондай-ақ халықтың кірісін арттырудың негізгі тетіктерінің бірі ретінде тұрақты жұмыспен қамту мен жаңа жұмыс орындарын құруға басымдық берілетінін атап өтті.
Мемлекет басшысының Жарлығымен Олжас Абайұлы Бектенов Қазақстан Республикасының Премьер-Министрі лауазымына тағайындалды.
