Қырғызстан мен Өзбекстан арасындағы шекараны делимитациялау туралы келісім іс жүзінде жүзеге аса бастады. Екі мемлекет Чоң-Гара мен Таш-Дөбө ауылдарын Қырғызстанның қарамағына беру рәсімін ресми түрде бастады, деп хабарлайды dalanews.kz.
Қазіргі уақытта арнайы құрылған бірлескен жұмыс тобы аталған ауылдардың тұрғындарын тіркеу, құжаттарын рәсімдеу, азаматтық беру, сондай-ақ мүлік пен көші-қонға қатысты мәселелерді реттеумен айналысып жатыр.
Бұл елді мекендерде негізінен этникалық қырғыздар тұрады. Жалпы тұрғындар саны шамамен 2,5 мың адамды құрайды. Тіркеу жұмыстары аяқталғаннан кейін олардың барлығы Қырғызстан азаматтығын алу рәсімінен өтеді.
Келісім аясында Қырғызстан Өзбекстанға көлемі жағынан тең келетін жер телімдерін береді. Бұл қадам екі ел арасындағы мемлекеттік шекараны толық айқындауға және ондаған жылдар бойы шешімін таппай келген аумақтық мәселелерді реттеуге бағытталған.
Сарапшылардың пікірінше, Орталық Азияда шекара мәселесі жиі дау-дамайға себеп болатынын ескерсек, бұл келісім өңірдегі ең маңызды дипломатиялық жетістіктердің бірі саналады.
