Нигерияның оңтүстік-батысындағы Ондо штатында әскери ұшақ апатқа ұшырап, борттағы 25 жолаушы мен жеті экипаж мүшесінің барлығы қаза тапты, деп хабарлайды dalanews.kz.
Оқиға 5 қазанда болған. Нигерия әскери-әуе күштерінің ATR-42 ұшағы Бенин-Ситиден Лагосқа қарай жоспарлы рейспен ұшқан. Авиация министрі Фестус Кеяма мәлімдегендей, әуе қозғалысын басқару қызметі ұшақпен байланысын Гринвич уақыты бойынша сағат 08:13-те жоғалтқан.
Кейін ұшақтың сынықтары Ондо штатындағы жағалауда орналасқан Игбокода қаласының маңынан табылды. Апат орны әскери-теңіз базасына жақын жерде орналасқан. Іздеу-құтқару жұмыстарына тиісті қызметтер жұмылдырылды.
Нигерия президенті Бола Тинубу апатта аман қалғандар болмағанын растады. Ол қаза тапқандардың отбасыларына көңіл айтып, ұшақтың құлау себебін анықтау үшін Нигерия әскери-әуе күштеріне жан-жақты тергеу жүргізуді тапсырды.
Билік әзірге апаттың нақты себебін жариялаған жоқ. Оқиға Нигериядағы соңғы жылдардағы ең ауыр авиациялық апаттардың бірі болды.
