Дүниежүзілік банктің сәуір айында жарияланған "Жаһандық экономикалық перспективалар" атты баяндамасында 2025 жылы Қазақстанның ЖІӨ өсімі 4,5%, 2026 жылы 3,6% болатыны болжанады. Осылайша әлемдік қаржы институты Қазақстан экономикасы өсімін төмендету тұрғысында қайта қарастырған, деп хабарлайды Dalanews.kz Интерфакс-Қазақстанға сілтеме жасап.
Айта кетсек, қаңтар айындағы болжамда 2025 жылға арналған бұл көрсеткіш 4,7%, ал 2026 жылғысы 3,5% деңгейінде сипат алған. Сондай-ақ Дүниежүзілік банктің бағалауы бойынша, 2024 жылы еліміздің ЖІӨ өсімі 4,8%-ды құрап, 2023 жылғы 5,1%-бен салыстырғанда төмен деңгейде қалыптасқан.
11 сәуірде Қазақстан президенті Қасым-Жомарт Тоқаев 2025 жылғы қаңтар-наурыз айларында Қазақстанның ЖІӨ өсімі 5,8% құрағанын мәлімдеген. Ұлттық Банкі 2025-2026 жылдары экономика өсімі 4,2-5,2% деңгейінде қалыптасады деп болжайды. Ал Азия Даму Банкі (АДБ) сәуір айындағы шолуда өзінің бұл тұрғыдағы болжамын төмендету тұрғысында қайра қарады: 2025 жылы - 4,9% (2024 жылғы қыркүйекте бұл көрсеткішті 5,1% болады деп берген), 2026 жылы - 4,1%. Халықаралық валюта қоры (ХВҚ) сәуір айындағы шолуда 2025 жылы қазақстандық ЖІӨ өсімін 5,5%-дан 4,9%-ға дейін төмендету, ал 2026 жылға 4,1%-дан 4,3%-ға дейін көтеру тұрғысында қайта қарады. 2025 жылғы қаңтар-ақпанда Қазақстанның ЖІӨ өсімі 5,4% құрады. Тауарлар өндірісі мен қызмет көрсету секторында қарқынды динамика байқалды. Бұл ретте BCC Invest сарапшылары Қазақстан экономикасында "қызып кету" және құрылымдық тепе-теңдіктің бұзылуы секілді қауіп белгілер барын ескертті.
