Батыс Қазақстанда алаяқ тұрғындарды жоғары табыс табуға уәде беріп, оларды жоқ кәсіпке ақша аудартып, 200 млн теңге көлемінде шығын келтірді, деп хабарлайды Dalanews.kz.

БҚО полиция департаменті криминалдық полиция басқармасының қызметкерлері Түркістан облысының 32 жастағы тұрғынын ұстады. Алданған тұрғындар алаяқпен әлеуметтік желі арқылы танысқан. Жәбірленушілердің бірі оған екі пәтердің ақшасын аударған.

"Алаяқ әйелге жоғары табыс табасың деп уәде беріп, қаржы салуды ұсынған. Әйел оған екі пәтерді сатудан түскен ақшасын қосып берген. Келтірілген залал 77 млн теңгеден асқан", – деп хабарлады полиция.

Сонымен қатар алаяқтың құрбандарына туысқандары мен таныстары да қосылған. Қазіргі уақытта алаяқтықтың алты эпизоды бойынша тергеу жүргізілуде. Күдікті қаржыны өз мұқтаждығына жұмсап, букмекерлік кеңселерде бәс тігіп, ұтылған.