Астанада бес баланы бір топ жасөспірімнің аяусыз соққыға жыққаны туралы ақпарат тарады, деп хабарлайды dalanews.kz.
Оқиғалар 10 және 11 маусым күндері елорданың бір ауданында болған. Зардап шеккен балалардың ата-аналарының айтуынша, жасөспірімдер тобы балаларға кезек-кезек шабуыл жасап, оларды ұрып-соққан. Кейбір шабуыл кезінде кастет қолданылған болуы мүмкін.
Шабуылдардың бір сәті бейнебақылау камерасына түсіп қалған. Балалардың алған дене жарақаттары дәрігерлер тарапынан тіркелгеннен кейін ата-аналары құқық қорғау органдарына арыз жазған.
Қылмыстық іс қозғалды
Астана қалалық полиция департаментінің мәліметінше, оқиғаға қатысқан барлық жасөспірім анықталып, полиция басқармасына жеткізілген. Тергеу барысында олардың бір-бірін бұрыннан танитыны белгілі болған. Аталған дерек бойынша денсаулыққа қасақана жеңіл зиян келтіру фактісімен қылмыстық іс қозғалды.
Қазіргі уақытта оқиғаның барлық мән-жайы анықталып жатыр.
