Алматы соттары сирек кездесетін сұңқарларды Қазақстаннан заңсыз алып шығу ісі бойынша үкім шығарды. Іс материалдарына сәйкес, үш адам шекара қызметкеріне пара ұсынып, жеті сұңқарды елден шығармақ болған, деп хабарлайды dalanews.kz.
Тергеу дерегінше, Иорданияда туған, Ресей азаматы ретінде Алматыда тұрған 59 жастағы Идрис Ибрахим Абу Джамалдың иелігінде жеті ителгі сұңқары болған. Бұл құстар сирек кездесетін түрлер қатарына жатады және Таяу Шығыс елдерінің қара нарығында жоғары бағаланады, деп жазады журналист Михаил Козачков.
Құстарды шетелге шығарудың жолын іздеген ол Талғар ауданының 53 жастағы тұрғыны Сейтжан Алаевқа жүгінген. Кейін олар Алматыда тұратын 68 жастағы Ауғанстан азаматы Ибрагим Азам Мохаммадпен байланыс орнатқан.
Тергеу нұсқасы бойынша, Мохаммад Алматы әуежайында қызмет атқаратын шекарашы танысын еске алып, онымен кездесуге келіскен. Кейін өткен кездесулердің бірінде күдіктілер шекара қызметкерінен жеті құсты елден кедергісіз шығаруға көмектесуді сұрап, әр құс үшін 3 мың доллардан төлеуге дайын екендерін айтқан.
Алайда шекара қызметкері бұл ұсыныс туралы бірден басшылығына хабарлаған. Осыдан кейін күдіктілермен жүргізілген барлық кездесулер құқық қорғау органдарының бақылауымен өткен. Келесі кездесуде үш азамат шекарашыға жалпы көлемі 21 мың долларды тапсырмақ болған сәтте ұсталды.
Сот барысында айыпталушылар тағылған айыптарды толық мойындамаған. Алаев ақша беруге қатыспағанын айтса, Мохаммад құстар туралы әңгімені есіне түсіре алмағанын мәлімдеген. Ал Абу Джамал өзінің басқа мәселеге байланысты көмек сұрадым деп түсіндірген.
Соған қарамастан сот олардың әрекеттерін дәлелденген деп танып, сирек кездесетін жануарлармен заңсыз айналысу және пара беру баптары бойынша кінәлі деп тапты. Үшеуіне де 7 жыл мерзімге бас бостандығынан айыру жазасы тағайындалды. Үкім заңды күшіне енді.
