Almaty sottary sirek kezdesetin suńqarlardy Qazaqstannan zańsyz alyp shyǵý isi boiynsha úkim shyǵardy. Is materialdaryna sáikes, úsh adam shekara qyzmetkerine para usynyp, jeti suńqardy elden shyǵarmaq bolǵan, dep habarlaidy dalanews.kz.
Tergeý dereginshe, Iordaniiada týǵan, Resei azamaty retinde Almatyda turǵan 59 jastaǵy Idris Ibrahim Abý Djamaldyń ieliginde jeti itelgi suńqary bolǵan. Bul qustar sirek kezdesetin túrler qataryna jatady jáne Taiaý Shyǵys elderiniń qara naryǵynda joǵary baǵalanady, dep jazady jýrnalist Mihail Kozachkov.
Qustardy shetelge shyǵarýdyń jolyn izdegen ol Talǵar aýdanynyń 53 jastaǵy turǵyny Seitjan Alaevqa júgingen. Keiin olar Almatyda turatyn 68 jastaǵy Aýǵanstan azamaty Ibragim Azam Mohammadpen bailanys ornatqan.
Tergeý nusqasy boiynsha, Mohammad Almaty áýejaiynda qyzmet atqaratyn shekarashy tanysyn eske alyp, onymen kezdesýge kelisken. Keiin ótken kezdesýlerdiń birinde kúdiktiler shekara qyzmetkerinen jeti qusty elden kedergisiz shyǵarýǵa kómektesýdi surap, ár qus úshin 3 myń dollardan tóleýge daiyn ekenderin aitqan.
Alaida shekara qyzmetkeri bul usynys týraly birden basshylyǵyna habarlaǵan. Osydan keiin kúdiktilermen júrgizilgen barlyq kezdesýler quqyq qorǵaý organdarynyń baqylaýymen ótken. Kelesi kezdesýde úsh azamat shekarashyǵa jalpy kólemi 21 myń dollardy tapsyrmaq bolǵan sátte ustaldy.
Sot barysynda aiyptalýshylar taǵylǵan aiyptardy tolyq moiyndamaǵan. Alaev aqsha berýge qatyspaǵanyn aitsa, Mohammad qustar týraly áńgimeni esine túsire almaǵanyn málimdegen. Al Abý Djamal óziniń basqa máselege bailanysty kómek suradym dep túsindirgen.
Soǵan qaramastan sot olardyń áreketterin dáleldengen dep tanyp, sirek kezdesetin janýarlarmen zańsyz ainalysý jáne para berý baptary boiynsha kináli dep tapty. Úsheýine de 7 jyl merzimge bas bostandyǵynan aiyrý jazasy taǵaiyndaldy. Úkim zańdy kúshine endi.
