С. Аманжолов атындағы ШҚУ-да қаржылық қауіпсіздікті үйретуге арналған форум өтті. Бұл шараны ШҚО-ның Экономикалық тергеп-тексеру Департаменті ұйымдастырды, деп хабарлайды Dalanews.kz

Бұл форум Мемлекет басшысының «Заң және тәртіп» бағдарламасы аясында қаржылық қауіпсіздікті арттыру және жастарды қаржылық қатерлер мен қауіптерден қорғау мақсатында атқарылып жатқан маңызды қадам.

Іс-шараға облыс әкімі Нұрымбет Сақтағанов, мемлекеттік органдардың өкілдері, университет оқытушылары мен студенттері қатысты.

Форумның басты мақсаты – жастар арасында қаржылық және құқықтық сауаттылық деңгейін арттыру, сондай-ақ студенттерге қаржылық қауіпсіздік саласындағы қазіргі заманғы қауіптер мен қатерлерді анықтау дағдыларын үйрету.

– Біз студенттеріміз бен оқушыларымызға жеңіл жолмен ақша табу мүмкін еместігін жеткізу үшін түрлі семинарлар өткізудеміз. Қазір көптеген студенттер қылмыстық схемалардың құрбаны болуда. Бұл білім мен мұндай қаржылық операцияларға иммунитеттің болмауынан. Сондықтан біз Қазақстан Республикасы Қаржылық мониторинг агенттігімен бірлесіп жұмыс жасап, қаржылық иммунитет пен мәдениетті қалыптастыруға тырысып жатырмыз. Осылайша сіздер алаяқтықты бірден анықтай аласыздар. Біз сіздерге сенеміз және олимпиадада жоғары деңгейде білім көрсетіп, жеңіспен оралуыңызға тілектеспіз. Бірақ ең бастысы – бұл қаржылық қауіпсіздік және қоғамымыздың қауіпсіздігі, – деді ШҚО әкімі Нұрымбет Сақтағанов.

Форум барысында қаржылық алаяқтықтар, дропперлер схемалары мен жеке қаржыны қорғаудың тәсілдері талқыланды. Студенттер қаржы саласындағы жаңа тенденцияларды меңгеріп, қауіптер мен қатерлерді тиімді анықтау дағдыларын игерді. Форум жастар, оқытушылар мен қаржы саласындағы мамандар арасында тәжірибе мен білім алмасу үшін маңызды алаңға айналды.

-Барлық студенттерімізді, оқытушыларымызды қаржылық тұрғыдан сауатты болуға шақырамыз. Біздің университетіміздің студенттері, “Шабыт” театры аудандарды әртүрлі қойылымдар қойып, халыққа түсіндіру жұмыстарын ары қарай жалғастыратын болады, – деді С. Аманжолов атындағы ШҚУ ректоры Мұхтар Төлеген.

Форумдағы маңызды шараларының бірі - қаржылық қауіпсіздік бойынша Ұлттық олимпиадаға студенттерді дайындау. Олимпиада алғаш рет өтеді және үш кезеңнен тұрады: онлайн тестілеу, оффлайн форматта эссе жазу және ақыл-ой ойындары мен фиджитал-шахмат турнирі арқылы финалдық іріктеу. Жеңімпаздар Ресейде өтетін Халықаралық қаржылық қауіпсіздік олимпиадасына қатысу мүмкіндігіне ие болады.

Олимпиадаға дайындық аясында 7-11 сәуір аралығында облыстың барлық университеттері мен колледждерінде арнайы дайындықтан өткен оқытушылар мен Департамент қызметкерлері дәрістер өткізеді. Дәрістер қаржылық алаяқтық схемалары, жеке деректерді қорғау және цифрлық дәуірдегі қаржылық қауіпсіздік мәселелерін қамтиды. Шараларға Шығыс Қазақстан облысындағы университеттер мен колледждерден 32 мыңға жуық студент қатысады деп күтілуде.

Сондай-ақ, дәрістер арасындағы үзілістерде интерактивті ойындар ұйымдастырылып, олар алынған білімдерді нығайтуға және жастар үшін оқытуды қызықты етуге көмектеседі. Студенттер қаржылық қауіпсіздік мәселесіне жоғары деңгейде қатысатындығын көрсететін «Қаржылық қауіпсіздік үшін!» және «Дропперлерге NO!» ұрандары астында акциялар мен флешмобтарға белсене қатысуда.

–Жастар – еліміздің болашағы. Олардың қаржылық құқық бұзушылықтарға және алаяқтықтарға қарсы тұрақтылығы тікелей олардың хабардарлығына байланысты. Біз осы шаралардың студенттерге тек теориялық білім алуға ғана емес, сонымен қатар практикалық дағдыларды дамытуға мүмкіндік беретінін сенеміз, – деді ШҚО бойынша Экономикалық тергеп-тексеру Департаментінің басшысы Арман Жунусов.

Форум мен олимпиадаға дайындық қаржылық қауіпсіздікті қамтамасыз ету жөніндегі мемлекеттік бағдарламаның маңызды бөлігіне айналды. Мұндай бастамалар жастарды қаржыларын тиімді басқаруға және қазіргі әлемдегі қаржылық қатерлермен күресуге дайын болуға көмектеседі.