س. امانجولوۆ اتىنداعى شقۋ-دا قارجىلىق قاۋىپسىزدىكتى ۇيرەتۋگە ارنالعان فورۋم ءوتتى. بۇل شارانى شقو-نىڭ ەكونوميكالىق تەرگەپ-تەكسەرۋ دەپارتامەنتى ۇيىمداستىردى، دەپ حابارلايدى Dalanews.kz
بۇل فورۋم مەملەكەت باسشىسىنىڭ «زاڭ جانە ءتارتىپ» باعدارلاماسى اياسىندا قارجىلىق قاۋىپسىزدىكتى ارتتىرۋ جانە جاستاردى قارجىلىق قاتەرلەر مەن قاۋىپتەردەن قورعاۋ ماقساتىندا اتقارىلىپ جاتقان ماڭىزدى قادام.
ءىس-شاراعا وبلىس اكىمى نۇرىمبەت ساقتاعانوۆ، مەملەكەتتىك ورگانداردىڭ وكىلدەرى، ۋنيۆەرسيتەت وقىتۋشىلارى مەن ستۋدەنتتەرى قاتىستى.
فورۋمنىڭ باستى ماقساتى – جاستار اراسىندا قارجىلىق جانە قۇقىقتىق ساۋاتتىلىق دەڭگەيىن ارتتىرۋ، سونداي-اق ستۋدەنتتەرگە قارجىلىق قاۋىپسىزدىك سالاسىنداعى قازىرگى زامانعى قاۋىپتەر مەن قاتەرلەردى انىقتاۋ داعدىلارىن ۇيرەتۋ.
– ءبىز ستۋدەنتتەرىمىز بەن وقۋشىلارىمىزعا جەڭىل جولمەن اقشا تابۋ مۇمكىن ەمەستىگىن جەتكىزۋ ءۇشىن ءتۇرلى سەمينارلار وتكىزۋدەمىز. ءقازىر كوپتەگەن ستۋدەنتتەر قىلمىستىق سحەمالاردىڭ قۇربانى بولۋدا. بۇل ءبىلىم مەن مۇنداي قارجىلىق وپەراسيالارعا يممۋنيتەتتىڭ بولماۋىنان. سوندىقتان ءبىز قازاقستان رەسپۋبليكاسى قارجىلىق مونيتورينگ اگەنتتىگىمەن بىرلەسىپ جۇمىس جاساپ، قارجىلىق يممۋنيتەت پەن مادەنيەتتى قالىپتاستىرۋعا تىرىسىپ جاتىرمىز. وسىلايشا سىزدەر الاياقتىقتى بىردەن انىقتاي الاسىزدار. ءبىز سىزدەرگە سەنەمىز جانە وليمپيادادا جوعارى دەڭگەيدە ءبىلىم كورسەتىپ، جەڭىسپەن ورالۋىڭىزعا تىلەكتەسپىز. ءبىراق ەڭ باستىسى – بۇل قارجىلىق قاۋىپسىزدىك جانە قوعامىمىزدىڭ قاۋىپسىزدىگى، – دەدى شقو اكىمى نۇرىمبەت ساقتاعانوۆ.
فورۋم بارىسىندا قارجىلىق الاياقتىقتار، دروپپەرلەر سحەمالارى مەن جەكە قارجىنى قورعاۋدىڭ تاسىلدەرى تالقىلاندى. ستۋدەنتتەر قارجى سالاسىنداعى جاڭا تەندەنسيالاردى مەڭگەرىپ، قاۋىپتەر مەن قاتەرلەردى ءتيىمدى انىقتاۋ داعدىلارىن يگەردى. فورۋم جاستار، وقىتۋشىلار مەن قارجى سالاسىنداعى ماماندار اراسىندا تاجىريبە مەن ءبىلىم الماسۋ ءۇشىن ماڭىزدى الاڭعا اينالدى.
-بارلىق ستۋدەنتتەرىمىزدى، وقىتۋشىلارىمىزدى قارجىلىق تۇرعىدان ساۋاتتى بولۋعا شاقىرامىز. ءبىزدىڭ ۋنيۆەرسيتەتىمىزدىڭ ستۋدەنتتەرى، “شابىت” تەاترى اۋدانداردى ءارتۇرلى قويىلىمدار قويىپ، حالىققا ءتۇسىندىرۋ جۇمىستارىن ارى قاراي جالعاستىراتىن بولادى، – دەدى س. امانجولوۆ اتىنداعى شقۋ رەكتورى مۇحتار تولەگەن.
فورۋمداعى ماڭىزدى شارالارىنىڭ ءبىرى - قارجىلىق قاۋىپسىزدىك بويىنشا ۇلتتىق وليمپياداعا ستۋدەنتتەردى دايىنداۋ. وليمپيادا العاش رەت وتەدى جانە ءۇش كەزەڭنەن تۇرادى: ونلاين تەستىلەۋ، وففلاين فورماتتا ەسسە جازۋ جانە اقىل-وي ويىندارى مەن فيدجيتال-شاحمات ءتۋرنيرى ارقىلى فينالدىق ىرىكتەۋ. جەڭىمپازدار رەسەيدە وتەتىن حالىقارالىق قارجىلىق قاۋىپسىزدىك وليمپياداسىنا قاتىسۋ مۇمكىندىگىنە يە بولادى.
وليمپياداعا دايىندىق اياسىندا 7-11 ءساۋىر ارالىعىندا وبلىستىڭ بارلىق ۋنيۆەرسيتەتتەرى مەن كوللەدجدەرىندە ارنايى دايىندىقتان وتكەن وقىتۋشىلار مەن دەپارتامەنت قىزمەتكەرلەرى دارىستەر وتكىزەدى. دارىستەر قارجىلىق الاياقتىق سحەمالارى، جەكە دەرەكتەردى قورعاۋ جانە سيفرلىق داۋىردەگى قارجىلىق قاۋىپسىزدىك ماسەلەلەرىن قامتيدى. شارالارعا شىعىس قازاقستان وبلىسىنداعى ۋنيۆەرسيتەتتەر مەن كوللەدجدەردەن 32 مىڭعا جۋىق ستۋدەنت قاتىسادى دەپ كۇتىلۋدە.
سونداي-اق، دارىستەر اراسىنداعى ۇزىلىستەردە ينتەراكتيۆتى ويىندار ۇيىمداستىرىلىپ، ولار الىنعان بىلىمدەردى نىعايتۋعا جانە جاستار ءۇشىن وقىتۋدى قىزىقتى ەتۋگە كومەكتەسەدى. ستۋدەنتتەر قارجىلىق قاۋىپسىزدىك ماسەلەسىنە جوعارى دەڭگەيدە قاتىساتىندىعىن كورسەتەتىن «قارجىلىق قاۋىپسىزدىك ءۇشىن!» جانە «دروپپەرلەرگە NO!» ۇراندارى استىندا اكسيالار مەن فلەشموبتارعا بەلسەنە قاتىسۋدا.
–جاستار – ەلىمىزدىڭ بولاشاعى. ولاردىڭ قارجىلىق قۇقىق بۇزۋشىلىقتارعا جانە الاياقتىقتارعا قارسى تۇراقتىلىعى تىكەلەي ولاردىڭ حاباردارلىعىنا بايلانىستى. ءبىز وسى شارالاردىڭ ستۋدەنتتەرگە تەك تەوريالىق ءبىلىم الۋعا عانا ەمەس، سونىمەن قاتار پراكتيكالىق داعدىلاردى دامىتۋعا مۇمكىندىك بەرەتىنىن سەنەمىز، – دەدى شقو بويىنشا ەكونوميكالىق تەرگەپ-تەكسەرۋ دەپارتامەنتىنىڭ باسشىسى ارمان جۋنۋسوۆ.
فورۋم مەن وليمپياداعا دايىندىق قارجىلىق قاۋىپسىزدىكتى قامتاماسىز ەتۋ جونىندەگى مەملەكەتتىك باعدارلامانىڭ ماڭىزدى بولىگىنە اينالدى. مۇنداي باستامالار جاستاردى قارجىلارىن ءتيىمدى باسقارۋعا جانە قازىرگى الەمدەگى قارجىلىق قاتەرلەرمەن كۇرەسۋگە دايىن بولۋعا كومەكتەسەدى.
