Ауылшаруашылығы министрлігі салықтан босатылатын көлік құралдарының тізімін бекітті. Осы сипаттағы бұйрыққа 2025 жылғы 18 қыркүйекте қол қойылды. Ол 2026 жылғы 1 қаңтардан бастап күшіне енеді, деп жазады Dalanews.kz.
Сонымен ауыл шаруашылығы, балық шаруашылығы өнімдерін өндіруші, сондай-ақ шаруа немесе фермер қожалықтарының басшылары мен мүшелері сипатындағы заңды тұлғалардың өз ауылшаруашылығы өндірісінде қолданатын, бірақ салық салуға жатпайтын арнайы көлік құралдарының тізіміне мыналар жатады:
- сүт пен су тасымалдауға арналған цистерналары бар ауылшаруашылығы мақсатындағы көліктер;
- ветеринариялық қызметтің автокөліктері мен автозообиологиялық зертханалары;
- жем таситын, жүк тиейтін, жанар-жағармай таситын көліктер;
- тыңайтқыш себетін және ұшақтарға химикаттар тиеуге арналған машиналар;
- шөп қаттайтын, жем шашатын арнайы техникалар;
- өзі жүретін дестелегіш;
- ауыл шаруашылығына арналған АН-2 ұшағы;
- астық оратын, жем-шөп жинайтын және өзге де арнайы комбайндар;
- тракторлар, өзі жүретін шөп шапқыштар;
- ауылшаруашылығы техникасын жөндеуге және техникалық қызмет көрсетуге арналған машиналар.
- саман жинайтын техника;
- қазып, теріп, оруға арналған комбайндар (картоп, қызанақ, жасыл бұршақ, мақта және өзге де ауылшаруашылығы өнімдері).
Осылайша, 2026 жылдың 1 қаңтарынан бастап аталған арнайы техника түрлері салық салуға жатпайды деп танылады.
Бұған дейін 2026 жылғы 1 қаңтардан бастап өз күшіне енетін жаңа Салық кодексі бойынша арнайы салық режимі – жеңілдетілген декларация негізінде жұмыс істей алатын және тыйым салынған қызмет түрлерінің тізімін жариялаған болатынбыз.
