Dalanews.kz тілшісі 1 желтоқсаннан бастап елімізде қандай өзгерістер болатынына шолу жасады.
Ауа райы
Синоптиктер қыс мезгілінде ауа райы қандай болатынын айтқан болатын.
Желтоқсан айында ауа температурасы елдің басым бөлігінде норма шамасында, республиканың солтүстік-батыс жартысында нормадан 1° жоғары; (Батыс Қазақстан, Атырау, Маңғыстау облыстарда, Ақтөбе, Қостанай, Солтүстік Қазақстан облыстарының басым бөлігінде, Ақмола облысының солтүстік-батысында), Шығыс Қазақстан облысының қиыр солтүстік-шығысында нормадан 1° төмен күтіледі (Шығыс Қазақстан облысының солтүстік-шығысында).
Желтоқсан айында жауын-шашын мөлшері республика аумағының басым бөлігінде норма шамасында, орталықта, елдің шығысының басым бөлігінде, Ақтөбе облысының шығысында, солтүстік аймақтың оңтүстік жартысында және оңтүстік облыстардың қиыр солтүстігінде нормадан аз болады деп болжанады.
Қаңтар айында ауа температурасы республика аумағының басым бөлігінде норма шамасында, республиканың шығысында нормадан 1° төмен болады деп болжанады (Абай, Жетісу облыстарында, Алматы облысының басым бөлігінде, Қарағанды, Павлодар облыстарының шығысында).
Жауын шашын мөлшері республика аумағының басым бөлігінде норма шамасында, республиканың оңтүстігі мен оңтүстік-шығысының таулы және тау бөктеріндегі аудандарында нормадан көп күтіледі (Түркістан, Жамбыл, Алматы, Жетісу және Шығыс Қазақстан облыстарының таулы және тау бөктеріндегі аудандарында).
Ақпан айында республика бойынша орташа айлық ауа температурасы нормадан 1-2°-қа жоғары болады деп күтілуде. Республиканың бүкіл аумағында жауын-шашын мөлшері климаттық норма шамасында болады деп болжанады.
Ипотека
Қазақстанда "Наурыз" ипотекалық бағдарламасына өтінім қабылдау аяқталды. Бағдарлама 2025 жылдың 3 қарашасынан 1 желтоқсанына дейін өтеді.
Бағдарламаға "Отбасы банк" салымшылары, сондай-ақ депозитінде кемінде 2 миллион теңге жинағы бар және соңғы бес жылда өз атына баспана тіркелмеген (отбасы мүшелерін қоса алғанда) азаматтар қатыса алды.
Ал 17 қарашадан бастап бірден екі жаңа ипотекалық бағдарлама іске қосылды: жаңа тұрғын үй сатып алуға арналған "Наурыз Әскери" және екінші деңгейлі баспанаға бағытталған "Әскери баспана".
Рейд
2025 жылдың 1 желтоқсанынан бастап ТЖМ мен ІІМ жаңа жылдық мереке кезеңіндегі қауіпсіздікті арттыруға бағытталған профилактикалық шараларды бастайды. Ведомство қызметкерлері газ баллондарын қолдану мен пиротехникаға байланысты құқықбұзушылықтардың алдын алу үшін рейдтер жүргізеді. Тексеріс кәсіпкерлерге де, қарапайым азаматтарға да қатысты болады.
Рейдтер жаңа жылдық мерекелер өтетін орындарда да өтеді. Онда эвакуациялық шығу жолдары, өрт дабылы жүйелері және өрт қауіпсіздігі талаптарының сақталуы тексеріледі. Сонымен қатар кәсіпкерлермен және мерекелік іс-шараларды ұйымдастырушылармен кездесулер өткізу жоспарланған.
Дәрі-дәрмек
ҚР Денсаулық сақтау министрлігі дәрілік заттар мен медициналық бұйымдарды мемлекеттік тіркеу және қайта тіркеу ережелеріне өзгерістер енгізді. Ведомство басшысының бұйрығы 2025 жылдың 1 желтоқсанынан бастап күшіне енеді.
"Мемлекеттік тіркеу кезінде дәрілік заттарға, оның ішінде, Қазақстанда өндірілгендерден басқаларына 5 жыл мерзімге тіркеу куәлігі беріледі", - делінген бұйрықта.
Қазақстанда өндірілген дәрілік заттар мен медициналық бұйымдарға мемлекеттік тіркеу барысында мерзімсіз тіркеу куәлігі беріледі.
Демалыс
Желтоқсанда қазақстандықтарға Тәуелсіздік күніне орай қосымша демалыс беріледі. 2025 жылы мереке 16 желтоқсан - сейсенбіге түседі, сол себепті апта ортасында қысқа демалыс берілмек.
Жалпы алғанда, желтоқсан айында бес күндік жұмыс аптасында - 9 демалыс, 22 жұмыс күні, ал алты күндік режимде - 4 демалыс және 26 жұмыс күні болады.
Жаңа жылға жоспар құрып жүргендер мынаны ескеруі керек: 2025 жылы 31 желтоқсан - жұмыс күні. Сондықтан мерекеге қажетті заттарды, дайындықты және сапарларды алдын ала ойластырған жөн.
Сонымен қатар, желтоқсанда бірнеше кәсіби мереке аталып өтеді:
• 5 желтоқсан - Адвокатура күні;
• 6 желтоқсан - Прокуратура күні;
• 13 желтоқсан - Қылмыстық-атқару жүйесі қызметкерлерінің күні;
• 20 желтоқсан - Қазақстанның Мемлекеттік фельдъегерлік қызметі күні;
• 22 желтоқсан - Энергетиктер күні және Архивист күні.
Туризм
Алматы облысындағы Қайыңды көлі маңындағы жаяу жүргіншілер соқпағы соңғы уақытта жөндеу жұмыстарына байланысты жабық тұрған еді. "Көлсай көлдері" ұлттық паркінің баспасөз қызметі соқпақ 2025 жылдың 1 желтоқсанынан бастап қайта туристерге ашылатынын хабарлады.
