Dalanews.kz tilshisi 1 jeltoqsannan bastap elimizde qandaı ózgerister bolatynyna sholý jasady.
Aýa raıy
Sınoptıkter qys mezgilinde aýa raıy qandaı bolatynyn aıtqan bolatyn.
Jeltoqsan aıynda aýa temperatýrasy eldiń basym bóliginde norma shamasynda, respýblıkanyń soltústik-batys jartysynda normadan 1° joǵary; (Batys Qazaqstan, Atyraý, Mańǵystaý oblystarda, Aqtóbe, Qostanaı, Soltústik Qazaqstan oblystarynyń basym bóliginde, Aqmola oblysynyń soltústik-batysynda), Shyǵys Qazaqstan oblysynyń qıyr soltústik-shyǵysynda normadan 1° tómen kútiledi (Shyǵys Qazaqstan oblysynyń soltústik-shyǵysynda).
Jeltoqsan aıynda jaýyn-shashyn mólsheri respýblıka aýmaǵynyń basym bóliginde norma shamasynda, ortalyqta, eldiń shyǵysynyń basym bóliginde, Aqtóbe oblysynyń shyǵysynda, soltústik aımaqtyń ońtústik jartysynda jáne ońtústik oblystardyń qıyr soltústiginde normadan az bolady dep boljanady.
Qańtar aıynda aýa temperatýrasy respýblıka aýmaǵynyń basym bóliginde norma shamasynda, respýblıkanyń shyǵysynda normadan 1° tómen bolady dep boljanady (Abaı, Jetisý oblystarynda, Almaty oblysynyń basym bóliginde, Qaraǵandy, Pavlodar oblystarynyń shyǵysynda).
Jaýyn shashyn mólsheri respýblıka aýmaǵynyń basym bóliginde norma shamasynda, respýblıkanyń ońtústigi men ońtústik-shyǵysynyń taýly jáne taý bókterindegi aýdandarynda normadan kóp kútiledi (Túrkistan, Jambyl, Almaty, Jetisý jáne Shyǵys Qazaqstan oblystarynyń taýly jáne taý bókterindegi aýdandarynda).
Aqpan aıynda respýblıka boıynsha ortasha aılyq aýa temperatýrasy normadan 1-2°-qa joǵary bolady dep kútilýde. Respýblıkanyń búkil aýmaǵynda jaýyn-shashyn mólsheri klımattyq norma shamasynda bolady dep boljanady.
Ipoteka
Qazaqstanda "Naýryz" ıpotekalyq baǵdarlamasyna ótinim qabyldaý aıaqtaldy. Baǵdarlama 2025 jyldyń 3 qarashasynan 1 jeltoqsanyna deıin ótedi.
Baǵdarlamaǵa "Otbasy bank" salymshylary, sondaı-aq depozıtinde keminde 2 mıllıon teńge jınaǵy bar jáne sońǵy bes jylda óz atyna baspana tirkelmegen (otbasy múshelerin qosa alǵanda) azamattar qatysa aldy.
Al 17 qarashadan bastap birden eki jańa ıpotekalyq baǵdarlama iske qosyldy: jańa turǵyn úı satyp alýǵa arnalǵan "Naýryz Áskerı" jáne ekinshi deńgeıli baspanaǵa baǵyttalǵan "Áskerı baspana".
Reıd
2025 jyldyń 1 jeltoqsanynan bastap TJM men İİM jańa jyldyq mereke kezeńindegi qaýipsizdikti arttyrýǵa baǵyttalǵan profılaktıkalyq sharalardy bastaıdy. Vedomstvo qyzmetkerleri gaz balondaryn qoldaný men pırotehnıkaǵa baılanysty quqyqbuzýshylyqtardyń aldyn alý úshin reıdter júrgizedi. Tekseris kásipkerlerge de, qarapaıym azamattarǵa da qatysty bolady.
Reıdter jańa jyldyq merekeler ótetin oryndarda da ótedi. Onda evakýasıalyq shyǵý joldary, órt dabyly júıeleri jáne órt qaýipsizdigi talaptarynyń saqtalýy tekseriledi. Sonymen qatar kásipkerlermen jáne merekelik is-sharalardy uıymdastyrýshylarmen kezdesýler ótkizý josparlanǵan.
Dári-dármek
QR Densaýlyq saqtaý mınıstrligi dárilik zattar men medısınalyq buıymdardy memlekettik tirkeý jáne qaıta tirkeý erejelerine ózgerister engizdi. Vedomstvo basshysynyń buıryǵy 2025 jyldyń 1 jeltoqsanynan bastap kúshine enedi.
"Memlekettik tirkeý kezinde dárilik zattarǵa, onyń ishinde, Qazaqstanda óndirilgenderden basqalaryna 5 jyl merzimge tirkeý kýáligi beriledi", - delingen buıryqta.
Qazaqstanda óndirilgen dárilik zattar men medısınalyq buıymdarǵa memlekettik tirkeý barysynda merzimsiz tirkeý kýáligi beriledi.
Demalys
Jeltoqsanda qazaqstandyqtarǵa Táýelsizdik kúnine oraı qosymsha demalys beriledi. 2025 jyly mereke 16 jeltoqsan - seısenbige túsedi, sol sebepti apta ortasynda qysqa demalys berilmek.
Jalpy alǵanda, jeltoqsan aıynda bes kúndik jumys aptasynda - 9 demalys, 22 jumys kúni, al alty kúndik rejımde - 4 demalys jáne 26 jumys kúni bolady.
Jańa jylǵa jospar quryp júrgender mynany eskerýi kerek: 2025 jyly 31 jeltoqsan - jumys kúni. Sondyqtan merekege qajetti zattardy, daıyndyqty jáne saparlardy aldyn ala oılastyrǵan jón.
Sonymen qatar, jeltoqsanda birneshe kásibı mereke atalyp ótedi:
• 5 jeltoqsan - Advokatýra kúni;
• 6 jeltoqsan - Prokýratýra kúni;
• 13 jeltoqsan - Qylmystyq-atqarý júıesi qyzmetkerleriniń kúni;
• 20 jeltoqsan - Qazaqstannyń Memlekettik feldegerlik qyzmeti kúni;
• 22 jeltoqsan - Energetıkter kúni jáne Arhıvıst kúni.
Týrızm
Almaty oblysyndaǵy Qaıyńdy kóli mańyndaǵy jaıaý júrginshiler soqpaǵy sońǵy ýaqytta jóndeý jumystaryna baılanysty jabyq turǵan edi. "Kólsaı kólderi" ulttyq parkiniń baspasóz qyzmeti soqpaq 2025 jyldyń 1 jeltoqsanynan bastap qaıta týrıserge ashylatynyn habarlady.
