سوڭعى ۋاقىتتا كەسٸپكەرلەر اۋداندىق مەملەكەتتٸك كٸرٸستەر باسقارمالارىنان جيٸ شاقىرتۋ الا باستاعان. سالىق ورگاندارى مۇنى بۇرىن بەرٸلگەن كامەرالدىق باقىلاۋ حابارلامالارىنىڭ ورىندالماۋىمەن بايلانىستىرادى. زاڭگەرلەردٸڭ ايتۋىنشا, وسى نەگٸزدە كەيبٸر كەسٸپكەرلەرگە جوسپاردان تىس سالىقتىق تەكسەرۋ تاعايىنداۋ تۋرالى الدىن الا شەشٸمدەر شىعارىلىپ جاتىر.
بۇل مەسەلە جٶنٸندە زاڭگەر ەرٸ سالىق كەڭەسشٸسٸ عابيتجان قۇدايبەرگەن ەلەۋمەتتٸك جەلٸدەگٸ پاراقشاسىندا پٸكٸر بٸلدٸرٸپ, مۇنداي ەرەكەتتەردٸڭ زاڭدىلىعىنا كٷمەن كەلتٸردٸ, دەپ حابارلايدى dalanews.kz.
ونىڭ ايتۋىنشا, كەي جاعدايلاردا كەسٸپكەرلەردەن قۇجاتتاردى ٶتە قىسقا مەرزٸمدە ۇسىنۋ تالاپ ەتٸلەدٸ. ساراپشى مۇنداي تەجٸريبە قولدانىستاعى رەسٸمدەرگە سەيكەس كەلمەۋٸ مٷمكٸن ەكەنٸن اتاپ ٶتتٸ.
«كەسٸپكەرلەردەن بٸر تەۋلٸك ٸشٸندە كٶلەمدٸ قۇجاتتار پاكەتٸن ۇسىنۋدى تالاپ ەتۋ جاعدايلارى كەزدەسٸپ جاتىر. الايدا زاڭنامادا رەسمي سالىقتىق تەكسەرۋ كەزٸندە قۇجاتتاردى تاپسىرۋ ٷشٸن بەلگٸلٸ بٸر مەرزٸم قاراستىرىلعان», – دەيدٸ ول.
ساراپشىنىڭ پٸكٸرٸنشە, باستى مەسەلە اۋداندىق دەڭگەيدەگٸ مەملەكەتتٸك كٸرٸستەر باسقارمالارىنىڭ مۇنداي تەكسەرۋلەردٸ تاعايىنداۋ قۇزىرەتٸنە قاتىستى بولىپ وتىر.
عابيتجان قۇدايبەرگەننٸڭ تٷسٸندٸرۋٸنشە, قارجى مينيسترٸنٸڭ مٸندەتٸن اتقارۋشىنىڭ 2025 جىلعى 31 قازانداعى №659 بۇيرىعىمەن بەكٸتٸلگەن قاعيدالارعا سەيكەس, كامەرالدىق باقىلاۋ نەتيجەلەرٸ بويىنشا كەيبٸر تەكسەرۋلەردٸ تاعايىنداۋ قۇقىعى وبلىستىق دەڭگەيدەگٸ مەملەكەتتٸك كٸرٸستەر دەپارتامەنتتەرٸنٸڭ قۇزىرەتٸنە جاتقىزىلعان.
وسىعان بايلانىستى زاڭگەر كەسٸپكەرلەرگە مەملەكەتتٸك ورگاننان كەلگەن قۇجاتتاردى مۇقييات زەردەلەپ, قاجەت بولعان جاعدايدا قۇقىقتىق كەڭەس الۋعا كەڭەس بەرەدٸ.
ساراپشىنىڭ ايتۋىنشا, ەگەر كەسٸپكەر مەملەكەتتٸك ورگان ەرەكەتتەرٸن زاڭسىز دەپ ەسەپتەسە, ول ٶز ۇستانىمىن تىڭداۋ رەسٸمٸ بارىسىندا بٸلدٸرۋگە, سونداي-اق زاڭنامادا كٶزدەلگەن تەرتٸپپەن پروكۋراتۋرا ورگاندارىنا نەمەسە سوتقا جٷگٸنۋگە قۇقىلى.
ايتا كەتەيٸك, اتالعان مەسەلەگە قاتىستى مەملەكەتتٸك كٸرٸستەر ورگاندارى ەزٸرگە رەسمي تٷسٸنٸكتەمە بەرگەن جوق.
