Sońǵy ýaqytta kásipkerler aýdandyq Memlekettik kirister basqarmalarynan jii shaqyrtý ala bastaǵan. Salyq organdary muny buryn berilgen kameraldyq baqylaý habarlamalarynyń oryndalmaýymen bailanystyrady. Zańgerlerdiń aitýynsha, osy negizde keibir kásipkerlerge jospardan tys salyqtyq tekserý taǵaiyndaý týraly aldyn ala sheshimder shyǵarylyp jatyr.
Bul másele jóninde zańger ári salyq keńesshisi Ǵabitjan Qudaibergen áleýmettik jelidegi paraqshasynda pikir bildirip, mundai áreketterdiń zańdylyǵyna kúmán keltirdi, dep habarlaidy dalanews.kz.
Onyń aitýynsha, kei jaǵdailarda kásipkerlerden qujattardy óte qysqa merzimde usyný talap etiledi. Sarapshy mundai tájiribe qoldanystaǵy rásimderge sáikes kelmeýi múmkin ekenin atap ótti.
«Kásipkerlerden bir táýlik ishinde kólemdi qujattar paketin usynýdy talap etý jaǵdailary kezdesip jatyr. Alaida zańnamada resmi salyqtyq tekserý kezinde qujattardy tapsyrý úshin belgili bir merzim qarastyrylǵan», – deidi ol.
Sarapshynyń pikirinshe, basty másele aýdandyq deńgeidegi memlekettik kirister basqarmalarynyń mundai tekserýlerdi taǵaiyndaý quzyretine qatysty bolyp otyr.
Ǵabitjan Qudaibergenniń túsindirýinshe, Qarjy ministriniń mindetin atqarýshynyń 2025 jylǵy 31 qazandaǵy №659 buiryǵymen bekitilgen qaǵidalarǵa sáikes, kameraldyq baqylaý nátijeleri boiynsha keibir tekserýlerdi taǵaiyndaý quqyǵy oblystyq deńgeidegi Memlekettik kirister departamentteriniń quzyretine jatqyzylǵan.
Osyǵan bailanysty zańger kásipkerlerge memlekettik organnan kelgen qujattardy muqiiat zerdelep, qajet bolǵan jaǵdaida quqyqtyq keńes alýǵa keńes beredi.
Sarapshynyń aitýynsha, eger kásipker memlekettik organ áreketterin zańsyz dep eseptese, ol óz ustanymyn tyńdaý rásimi barysynda bildirýge, sondai-aq zańnamada kózdelgen tártippen prokýratýra organdaryna nemese sotqa júginýge quqyly.
Aita keteiik, atalǵan máselege qatysty memlekettik kirister organdary ázirge resmi túsinikteme bergen joq.
