كييەۆ ءبىر شارتپەن، ياعني رەسەي اسكەرىن شىعارىپ، ۋكراينانىڭ اۋماقتىق تۇتاستىعىن قۇرمەتتەسە، ماسكەۋمەن ەرتەڭ-اق كەلىسسوزدەردى باستاۋعا دايىن. بۇل تۋرالى ۆلاديمير زەلەنسكيي شۆەيسارياداعى بەيبىتشىلىك ءسامميتىنىڭ قورىتىندىسى بويىنشا وتكەن باسپا ءسوز ءماسليحاتىندا مالىمدەدى، - دەپ حابارلايدى Dalanews.kz.

"رەسەي ءبىزدىڭ اۋماعىمىزدان شىقسا، ەشتەڭەنى كۇتپەي ەرتەڭ-اق بىزبەن كەلىسسوزدەر جۇرگىزە الادى. بۇل - بۇۇ جارعىسىنا قۇرمەت"، - دەدى زەلەنسكيي.

ول رەسەيدىڭ كەلەسى بەيبىتشىلىك سامميتىنە قاتىسۋى "ولاردىڭ بەيبىتشىلىكتى قالايتىنىن جانە سوعىستى اياقتاۋعا دايىن" ەكەنىن بىلدىرەتىنىن ايتتى.

"ول مۇنى ءوزى قالاي ما، الدە ونى الەمدىك قاۋىمداستىق ماجبۇرلەي مە، بۇل ءبىز ءۇشىن ماڭىزدى ەمەس. ءبىز ءۇشىن ماڭىزدىسى ناتيجە - سوعىستىڭ اياقتالۋى جانە بەيبىتشىلىك"، - دەدى زەلەنسكيي.

ونىڭ ايتۋىنشا، ۋكراينا كەيبىر ەلدەرمەن ەكىنشى بەيبىتشىلىك ءسامميتىن وتكىزۋ تۋرالى كەلىسسوزدەر جۇرگىزىپ جاتىر، وعان دايىندىق بىرنەشە جىل ەمەس، بىرنەشە ايعا سوزىلادى.

سونداي-اق، ول كوپتەگەن ەل رەسەي وكىلدەرىن قازىرگى سامميتكە تارتقىسى كەلەتىنىن، ءبىراق كەيبىرەۋلەرى ولارمەن ءتىپتى بايلانىسقىسى كەلمەيتىنىن ايتتى.

ۋكراينا بويىنشا بەيبىتشىلىك ءسامميتى 15-16 ماۋسىم ارالىعىندا شۆەيساريادا ءوتتى. وعان 160-تان اسا ەل شاقىرىلدى، ءبىراق ءىشىنارا تانىلعان كوسوۆونى قوسقاندا 92ء-سى عانا قاتىستى. رەسەي كونفەرەنسياعا شاقىرىلمادى.

سامميت قارساڭىندا رەسەي پرەزيدەنتى ۆلاديمير پۋتين ەگەر ۋكراينا اسكەرى دحر، لحر، حەرسون جانە زاپوروجە وبلىستارىنان تولىعىمەن شىعارىلسا، سونداي-اق، ۋكراينا ناتو-عا مۇشەلىكتەن باس تارتسا، ماسكەۋ قاقتىعىستى توقتاتۋعا دايىن ەكەنىن ايتتى.