مەيرامبەك ءاليحاننىڭ قىتايدان قونىس اۋدارعانىنا ءبىر جىل بولعان. مىسىر تاۋىعىن ءوسىرۋدى سول جاقتا ۇيرەنگەن ەكەن.
ءقازىر سول كورگەنى بويىنشا ءوز بيزنەسىن باستاپ وتىر.
«قىتايدا بۇلاردى مەرۋەرت تاۋىق دەپ اتايدى. مەن جۇمىس ىستەگەن كاسىپورىندا مىڭداعان تاۋىق وسىرەتىن. بۇل قۇستاردىڭ بابىن، قانداي جەم جەيتىنىن، قانداي كۇتىم كەرەك ەكەنىن جاقسى بىلەمىن. سوندىقتان، وسى ىسكە بەت بۇردىق» - دەيدى جاس كاسىپكەر.
ايتۋىنشا، جۇبايى ەكەۋى دە «بيزنەس باستاۋ» باعدارلاماسى بويىنشا كاسىپكەرلىك نەگىزدەرىن وقىپ، ىسكەرلىكتىڭ الىپپەسىن مەڭگەرگەن.
ال «ناتيجەلى جۇمىسپەن قامتۋ» باعدارلاماسى بويىنشا بەرىلەتىن گرانتقا ينكۋباتور اپپاراتىن ساتىپ العان. مىسىر تاۋىعىنىڭ 50 بالاپانىن الماتى وبلىسىنان تاپسىرىسپەن الدىرىپتى.
«اپپارات 250 مىڭ تەڭگەگە شىقتى. ءبىر جولدا 1056 جۇمىرتقا شايقايدى. ودان ۇلكەنىن الۋعا گرانتتىڭ اقشاسى جەتپەدى. رەسەيدەن 500 قازدىڭ جۇمىرتقاسىنا تاپسىرىس بەرىپ، جاز بويى ءوسىرىپ شىقتىم» - دەيدى مەيرامبەك ءاليحان.
بۇگىنگى تاڭدا جاس كاسىپكەر العاشقى ءونىمىن الماتى مەن استانا مەيرامحانالارىنا ساتتى. دەگەنمەن سۇرانىس جوعارى.
ءبىراق مەيرامبەك ءاليحاننىڭ ايتۋىنشا، جەرگىلىكتى اكىمدىك تاراپىنان 7 گا جەر بەرىلسە، شارۋاشىلىق ودان ءارى كەڭەيىپ جوعارى سۇرانىسقا جاۋاپ بەرەر ەدى.
جەر راسىمدەۋ ماسەلەلەرىن اياقتاپ، ەندى اكىمدىك تاراپىنان جاۋاپ كۇتۋدە. ويتكەنى اۋلاسىنداعى 10 سوتىق جەرگە ۇلكەن شارۋاشىلىقتى دوڭگەلەتۋ مۇمكىن ەمەس.
«نارىقتا ءبىر جۇمىرتقاسىنىڭ ءوزى 350 تەڭگە تۇرادى. حالىقارالىق ينتەرنەت ساۋدا جەلىسىنە تاۋار ءوندىرۋشى رەتىندە كىرۋ ءۇشىن قۇستىڭ باسى 3000-نان اسۋى ءتيىس ەكەن. ءبىر كەلگەندە 2000 دانا جۇمىرتقا تاپسىرا الاتىن دەڭگەيگە جەتسەك، وزدەرى-اق اكەتىپ وتىرادى. مەنەن تەك ۆەتەرينارلىق ستاندارتتاردى قاتاڭ ساقتاۋ تالاپ ەتىلەدى. ياعني سىرتقا تاسۋعا ەشقانداي شىعىن كەتپەيدى. بۇل مەجەگە جەتۋ ءۇشىن شارۋاشىلىقتى كەڭەيتۋ قاجەت» - دەيدى جاس كاسىپكەر.
اسەم جىلقىشيەۆا
