Meirambek Álihannyń Qytaidan qonys aýdarǵanyna bir jyl bolǵan. Mysyr taýyǵyn ósirýdi sol jaqta úirengen eken.
Qazir sol kórgeni boiynsha óz biznesin bastap otyr.
«Qytaida bulardy merýert taýyq dep ataidy. Men jumys istegen kásiporynda myńdaǵan taýyq ósiretin. Bul qustardyń babyn, qandai jem jeitinin, qandai kútim kerek ekenin jaqsy bilemin. Sondyqtan, osy iske bet burdyq» - deidi jas kásipker.
Aitýynsha, jubaiy ekeýi de «Biznes bastaý» baǵdarlamasy boiynsha kásipkerlik negizderin oqyp, iskerliktiń álippesin meńgergen.
Al «Nátijeli jumyspen qamtý» baǵdarlamasy boiynsha beriletin grantqa inkýbator apparatyn satyp alǵan. Mysyr taýyǵynyń 50 balapanyn Almaty oblysynan tapsyryspen aldyrypty.
«Apparat 250 myń teńgege shyqty. Bir jolda 1056 jumyrtqa shaiqaidy. Odan úlkenin alýǵa granttyń aqshasy jetpedi. Reseiden 500 qazdyń jumyrtqasyna tapsyrys berip, jaz boiy ósirip shyqtym» - deidi Meirambek Álihan.
Búgingi tańda jas kásipker alǵashqy ónimin Almaty men Astana meiramhanalaryna satty. Degenmen suranys joǵary.
Biraq Meirambek Álihannyń aitýynsha, jergilikti ákimdik tarapynan 7 ga jer berilse, sharýashylyq odan ári keńeiip joǵary suranysqa jaýap berer edi.
Jer rásimdeý máselelerin aiaqtap, endi ákimdik tarapynan jaýap kútýde. Óitkeni aýlasyndaǵy 10 sotyq jerge úlken sharýashylyqty dóńgeletý múmkin emes.
«Naryqta bir jumyrtqasynyń ózi 350 teńge turady. Halyqaralyq internet saýda jelisine taýar óndirýshi retinde kirý úshin qustyń basy 3000-nan asýy tiis eken. Bir kelgende 2000 dana jumyrtqa tapsyra alatyn deńgeige jetsek, ózderi-aq áketip otyrady. Menen tek veterinarlyq standarttardy qatań saqtaý talap etiledi. Iaǵni syrtqa tasýǵa eshqandai shyǵyn ketpeidi. Bul mejege jetý úshin sharýashylyqty keńeitý qajet» - deidi jas kásipker.
Ásem Jylqysheva
