تۇركيالىق كاسىپكەر قازاقستاننىڭ جۇرگىزىپ وتىرعان ينۆەستيسيالىق ساياساتىن وڭ باعالاپ، ەكىجاقتى قارىم-قاتىناستى ارتتىرۋ قاجەتتىگىنە نازار اۋداردى.
— ءبىزدىڭ وندىرىستىك ايماقتا ورىن تەپكەن ءبىرقاتار كاسىپورىن باسشىلارىمەن بىرىگىپ، الداعى شىلدە ايىندا قازاقستانعا جۇمىس ساپارمەن بارۋدى جوسپارلاپ وتىرمىز. ونىڭ اياسىندا قازاقستاندىق كاسىپكەرلەرمەن كەزدەسىپ، ءوزارا ىسكەرلىك بايلانىستاردى تەرەڭدەتپەكپىز. تۇركيا مەن قازاقستاننىڭ ساۋدا-ەكونوميكالىق الەۋەتى وتە زور. بۇل مۇمكىندىكتەردى قوس ەلدىڭ ىسكەر توپ وكىلدەرى ءتيىمدى پايدالانۋى ءتيىس دەپ ەسەپتەيمىن، – دەيدى تۇركياداعى «ەسكوپ» وندىرىستىك ايماعىنىڭ ءتوراعاسى يۋسۋف اقگيۋن.
جالپى تۇركىستان – ينۆەستورلار ءۇشىن تارتىمدى ءوڭىر. ماسەلەن مۇندا ەلىمىز بويىنشا جالعىز «قازاق-تۇرىك» يندۋستريالدى ايماعى جۇمىس ىستەيدى.
بۇگىندە اتالعان ايماقتا باۋىرلاس ەلمەن بىرلەسكەن قۇنى 25 ملرد تەڭگەنى قۇرايتىن 6 ينۆەستيسيالىق جوبا جۇزەگە اسىرىلۋدا. ناتيجەسىندە 900 جاڭا جۇمىس ورنى اشىلادى دەپ كۇتىلۋدە. اتالعان جوبالار كەزەڭ-كەزەڭىمەن 2020 جىلعا دەيىن ىسكە قوسىلاتىن بولادى.
قازاقستان مەن تۇركيا ەلدەرىنىڭ اراسىنداعى تاۋار اينالىم بۇگىندە 2 ملرد اقش دوللار شاماسىندا بولسا، الداعى ۋاقىتتا بۇل كورسەتكىشتى 5 ملرد دوللارعا جەتكىزۋ كوزدەلۋدە. بۇل جونىندە ديپلوماتيالىق بايلانىستىڭ 25 جىلدىعى اياسىندا قوس مەملەكەتتىڭ كوشباسشىلارى وتكەن جىلى استانا قالاسىندا بولعان كەزدەسۋدە ايتقان بولاتىن.
تۇركيا نەگىزىنەن قازاقستانعا تەكستيل، تاماق ونەركاسىبى مەن قۇرال-سايماندار يمپورتتاسا، ولار قازاقستاننىڭ مۇنايى مەن مەتالدارىنا، حيميا ونەركاسىبى ونىمدەرىنە ەرەكشە قىزىعۋشىلىق تانىتىپ وتىر.
