Túrkıalyq kásipker Qazaqstannyń júrgizip otyrǵan ınvestısıalyq saıasatyn oń baǵalap, ekijaqty qarym-qatynasty arttyrý qajettigine nazar aýdardy.
— Bizdiń óndiristik aımaqta oryn tepken birqatar kásiporyn basshylarymen birigip, aldaǵy shilde aıynda Qazaqstanǵa jumys saparmen barýdy josparlap otyrmyz. Onyń aıasynda qazaqstandyq kásipkerlermen kezdesip, ózara iskerlik baılanystardy tereńdetpekpiz. Túrkıa men Qazaqstannyń saýda-ekonomıkalyq áleýeti óte zor. Bul múmkindikterdi qos eldiń isker top ókilderi tıimdi paıdalanýy tıis dep esepteımin, – deıdi Túrkıadaǵy «Eskop» óndiristik aımaǵynyń tóraǵasy Iýsýf Aqgún.
Jalpy Túrkistan – ınvestorlar úshin tartymdy óńir. Máselen munda elimiz boıynsha jalǵyz «Qazaq-túrik» ındýstrıaldy aımaǵy jumys isteıdi.
Búginde atalǵan aımaqta baýyrlas elmen birlesken quny 25 mlrd teńgeni quraıtyn 6 ınvestısıalyq joba júzege asyrylýda. Nátıjesinde 900 jańa jumys orny ashylady dep kútilýde. Atalǵan jobalar kezeń-kezeńimen 2020 jylǵa deıin iske qosylatyn bolady.
Qazaqstan men Túrkıa elderiniń arasyndaǵy taýar aınalym búginde 2 mlrd AQSH dollar shamasynda bolsa, aldaǵy ýaqytta bul kórsetkishti 5 mlrd dollarǵa jetkizý kózdelýde. Bul jóninde dıplomatıalyq baılanystyń 25 jyldyǵy aıasynda qos memlekettiń kóshbasshylary ótken jyly Astana qalasynda bolǵan kezdesýde aıtqan bolatyn.
Túrkıa negizinen Qazaqstanǵa tekstıl, tamaq ónerkásibi men qural-saımandar ımporttasa, olar Qazaqstannyń munaıy men metaldaryna, hımıa ónerkásibi ónimderine erekshe qyzyǵýshylyq tanytyp otyr.
