Almatyda Asar Baspana qarjy piramidasyna qatysty sot úkimi shyqty. Uiymdastyrýshy segiz jylǵa bas bostandyǵynan aiyryldy. Taǵy birneshe adamǵa shartty jaza taǵaiyndaldy, dep habarlaidy dalanews.kz.
Mán-jaiy
Sot materialdaryna sáikes 2023 jylǵy qańtarda T. Asar Baspana tutyný kooperativine qatysý baǵdarlamalary arqyly azamattardan aqsha tartý shemasyn ázirlegen.
Qatysýshylarǵa túrli baǵdarlama usynylyp, osy arqyly tabys tabýǵa, kólik nemese baspana alýǵa bolady dep ýáde etilgen. Jańa salymshylardy tartý úshin uiymdastyrýshy Qazaqstannyń ár qalasynda óńirlik keńseler ashyp, kezdesýler men onlain is-sharalar ótkizgen. Sondai-aq, qurylymdaǵy qatysýshylarǵa nusqaý berip otyrǵan.
Keiin onyń qyzmetine taǵy birneshe adam men óńirlik jetekshiler tartylǵan. Olar jańa qatysýshylardy izdeýmen, keńselerdiń jumysyn uiymdastyrýmen, azamattardan aqsha qabyldap, baqylaýdaǵy shottarǵa aýdarýmen ainalysqan.
Jalpy Asar Baspana qyzmeti aiasynda azamattardan 25 422 708 589 teńge tartylǵan.
Sottalýshylar óz kinásin moiyndamaǵan.
Sot qandai sheshim shyǵardy?
Sot T.-ny kináli dep tanyp, segiz jylǵa bas bostandyǵynan aiyrdy. Oǵan jeti jyl boiy qarjylyq qyzmetpen ainalysýǵa tyiym salyndy. Taǵy úsh adam jeti jylǵa bas bostandyǵynan aiyrylyp, alty jyl boiy qarjylyq qyzmetpen ainalysý quqyǵynan aiyryldy.
Qalǵan sottalýshylarǵa otbasylyq jaǵdaiy, jasy, kámeletke tolmaǵan balalary bolýy jáne qurylymdaǵy róli qosalqy bolǵany eskerilip, shartty jaza taǵaiyndalǵan.
Sonymen qatar, T., B., D. jáne I.-diń múlkin tárkileý týraly sheshim qabyldanǵan. Tárkilengen múlik jábirlenýshilerge keltirilgen materialdyq shyǵyndy óteýge jumsalady. Sot úkimi áli zańdy kúshine engen joq.
