Shyǵys Qazaqstan oblysyndaǵy respýblikalyq mańyzy bar Óskemen-Altai-Úlken Naryn-Katonqaraǵai-Rahman qainary jolynyń 437-450 shaqyrym aralyǵyndaǵy ýchaskesi paidalanýǵa berildi. Joldyń jańartylǵan bóliginiń ashylý rásimine Shyǵys Qazaqstan oblysynyń ákimi Nurymbet Saqtaǵanov qatysty, dep habarlaidy dalanews.kz.
Joba 2025-2026 jyldary júzege asyryldy. Jóndeý jumystaryn «Stroitelnaia kompaniia Zaisan» JShS atqardy. Uzyndyǵy 13 shaqyrym bolatyn jolǵa jańa asfalt tóseldi. Sonymen qatar 17 sý ótkizý naýasy men 3 sý ótkizgish qubyr salyndy. Joldyń tiisti injenerlik jáne qaýipsizdik infraqurylymy da retke keltirildi.
– Bul joba eń aldymen, óńir jurtshylyǵy úshin mańyzdy. Jańartylǵan ýchaske jol boiyndaǵy eldi mekender turǵyndary úshin qaýipsiz ári jaily qatynasty qamtamasyz etedi. Sonymen qatar bul baǵyt Katonqaraǵai ulttyq parki men Rahman qainaryna baratyn týrister úshin de mańyzdy, - dedi Nurymbet Saqtaǵanov.
Jańartylǵan jol ýchaskesi jol júrý ýaqytyn qysqartýǵa jáne kólik quraldarynyń tozýyn azaitýǵa múmkindik beredi.
Aita keteiik, Óskemen-Altai-Úlken Naryn-Katonqaraǵai-Rahman qainary baǵyty óńirdiń áleýmettik-ekonomikalyq jáne týristik mańyzy joǵary kólik dálizderiniń biri sanalady. Shyǵys Qazaqstannyń týristik áleýetin arttyrýda kólik infraqurylymynyń sapasy erekshe mańyzdy. Aimaqtyń tabiǵi kórikti jerlerine keletin týrister sanynyń artýy joldardyń qoljetimdiligi men qaýipsizdigine qoiylatyn talaptardy da kúsheitip otyr. Oblys ákimi joldy jańǵyrtýmen qatar, ony aldaǵy ýaqytta tiisti deńgeide kútip ustaýdyń jáne sapasyn uzaq jyldar boiy saqtaýdyń mańyzyn atap ótti.
