Qazaqstanda pedagogterdi jumystan tys ýaqytta ata-analarmen messendjer arqyly habarlasýǵa mindetteýdi shekteý usynyldy. Bul týraly Quryltai depýtaty Ashat Aimaǵambetov Ustazdar kúnine arnalǵan jazbasynda aitty, dep habarlaidy dalanews.kz.
Depýtattyń sózinshe, sońǵy jyldary muǵalimderdiń quqyqtaryn qorǵaýǵa baǵyttalǵan birqatar zańnamalyq ózgeris qabyldanǵan.
"Demalys kúni balaǵa qatysty bir oqiǵa bolsa, sol ýaqytta óz otbasymen úiinde otyrǵan muǵalimnen túsinikteme talap etildi. Jyldar boiy bul qalypty jaǵdai sanalyp keldi. Maýsymda qabyldanǵan jańa zań osyny ózgertti", – deidi ol.
Jańa normalarǵa sáikes, pedagogten bir qujatty qatarynan qaǵaz jáne elektrondy túrde júrgizýdi talap etýge tyiym salyndy. Sondai-aq muǵalimderdi óz mindetine kirmeitin jumystarǵa tartýǵa shekteý qoiylǵan. Bul talaptar balabaqsha tárbieshileri men kolledj pedagogterine de qatysty.
Aimaǵambetovtiń aitýynsha, endigi negizgi mindet – osy normalardyń barlyq bilim berý uiymdarynda naqty oryndalýyn qamtamasyz etý.
Sonymen qatar pedagogterdiń jumys júktemesi, kásibi damýy jáne jas mamandardy qoldaý máseleleri áli de ózekti bolyp otyr.
"Jas pedagogti mektepke tartýmen shektelmei, ári qarai qoldaý mańyzdy. Keshki ýaqytta jáne demalys kúnderi ata-analarmen messendjerlerde hat almasý, áleýmettik jelige rils pen post jariialaýdy talap etý de – bólek másele.
Sondyqtan "Ádilet" partiiasynyń fraktsiiasyndaǵy áriptesterimizben birge zań jobasyn ázirledik. Onda pedagogterdi mazalaityn osy jáne basqa da problemalardy sheshý kózdelgen", – dedi ol.
