Qazaqstan Qarjy ministrligi 2029 jylǵa qarai salyqtyq rásimderge ketetin ýaqytty eki ese qysqartyp, adal biznesti tekserý sanyn azaitýdy josparlap otyr, dep habarlaidy dalanews.kz.
Bul týraly Digital Qazaqstan 2029 paneldik sessiiasynda aityldy. Vedomstvo ókilderi salyqtyq ákimshilendirýdi tsifrlandyrýdyń negizgi maqsaty tek tekserýler sanyn azaitý emes, baqylaýdy naqty táýekelderge baǵyttaý ekenin atap ótti.
Bul úshin memleket salyq tóleýshiler týraly qolda bar derekterdi barynsha paidalanýdy kózdep otyr. Tólemder, taýarlar men operatsiialar týraly aqparat biryńǵai tsifrlyq ortada jinaqtalsa, birqatar esepteýlerdi avtomatty túrde júrgizýge jáne kásipkerlerden bir aqparatty qaita-qaita suratýdy azaitýǵa múmkindik týady.
Osy baǵyttaǵy negizgi quraldardyń biri – Smart Data Finance júiesi. Qazir ol 80 derekkózden aqparat alady. 2026 jyldyń sońyna deiin júiege taǵy 20 derekkózdi qosý josparlanǵan. Osy málimetter negizinde 20,4 mln jeke tulǵanyń, 1,7 mln jeke kásipkerdiń jáne 590 myń kompaniianyń tsifrlyq profili qalyptastyrylǵan.
Tsifrlandyrýdyń birqatar elementteri qazirdiń ózinde jumys isteidi. Máselen, múlik, jer jáne kólik salyqtary avtomatty túrde esepteledi, al qosylǵan qun salyǵy boiynsha deklaratsiia aldyn ala toltyrylady. Kelesi kezeńde shaǵyn bizneske arnalǵan ońailatylǵan deklaratsiiany engizý josparlanyp otyr.
Salyqtyq baqylaýda jasandy intellektini paidalaný da keńeimek. Memlekettik kirister komitetiniń II-assistenti bir suraý arqyly 100-ge deiin kontragentti tekserýge múmkindik beredi. Al kedendik kómekshi 9 mln-nan astam deklaratsiia negizinde oqytylyp, taýardyń kodyn anyqtaýǵa kómektesedi.
Jasandy intellektiniń táýekelderdi anyqtaýdaǵy múmkindigi paralleldi testileý kezinde de baiqalǵan. 2025 jyldyń úshinshi toqsanyndaǵy kameraldyq baqylaýdy synaqtan ótkizý barysynda II-model dástúrli tásil anyqtamaǵan qosymsha 672 zańbuzýshylyqty anyqtaǵan.
Sonymen qatar tsifrlyq baqylaý taýar ainalymynyń ashyqtyǵyn arttyrýǵa baǵyttalmaq. Ulttyq katalogta 32 mln-nan astam taýar pozitsiiasy bar, al 700 mln-nan astam fiskaldyq chek taýar kodtarymen qalyptastyrylǵan. Bul derekter kóleńkeli ekonomikanyń kólemin azaitýǵa múmkindik beretin quraldardyń birine ainalmaq. 2029 jylǵa qarai onyń úlesin 16,7 paiyzdan 13,8 paiyzǵa deiin tómendetý josparlanǵan.
Tsifrlandyrý memlekettik shyǵyndardy baqylaýǵa da engizilip jatyr. Qarjy ministrligi baǵany salystyrý kezinde shamamen 1 mlrd fiskaldyq chek pen marketpleisterdegi málimetterdi paidalanatyn derekter bazasyn qalyptastyrǵan. Vedomstvonyń baǵalaýynsha, memlekettik satyp alýda medianalyq baǵalardy qoldaný jylyna 200 mlrd teńgege deiin únemdeýge múmkindik beredi.
Biýdjet qarajatynyń qozǵalysy da onlain rejimde baqylanady. Qazir monitoring 9,7 trln teńge kólemindegi biýdjet tólemderin qamtidy. 2024 jyldan beri 703 mlrd teńgege baǵalanǵan táýekeldi tólemder anyqtalǵan.
Memlekettik qoldaýdy bólý júiesi de tsifrlandyrylmaq. Ázirlenip jatqan Tsifrlyq biznes kartasy 2,4 mln shaǵyn jáne orta biznes sýbektisi týraly málimetti jáne jylyna shamamen 1,5 trln teńge kólemindegi 150 qoldaý sharasyn biriktiredi. Júie kásipker ótinish bermei turyp-aq oǵan sáikes keletin memlekettik qoldaý quraldaryn usynýy tiis.
Qarjy ministrligi 2027 jyly jasandy intellektini qyzmettiń segiz baǵytyna engizýdi josparlap otyr. Olardyń qatarynda biýdjet kiristeri men shyǵystaryn boljaý, sondai-aq salyq jáne keden máseleleri boiynsha keńes berý bar.
Jalpy, 2029 jylǵa deiingi jospardyń negizgi maqsaty – adal bizneske túsetin ákimshilik júktemeni azaityp, baqylaýdy naqty táýekelderge shoǵyrlandyrý jáne biýdjet qarajatynyń tiimdi jumsalýyn tsifrlyq quraldar arqyly kúsheitý.
