قازاقستاندا يپوتەكا ارقىلى باسپانا الاتىندار ءۇشىن نوتاريۋستىڭ قىزمەت اقىسى ارزاندادى. ەندى ساتىپ الۋ-ساتۋ كەلىسىمىن راسىمدەۋ قۇنى تومەندەتىلگەن تاريفپەن ەسەپتەلەدى، دەپ حابارلايدى Dalanews.kz.
وسىلايشا نوتاريۋستار مۇنداي مامىلە ءۇشىن 12 اەك ەمەس، 4 اەك الادى. 2026 جىلى 1 اەك كولەمى 4325 تەڭگە بولعاندىقتان، كەلىسىمدى راسىمدەۋ شامامەن 17 300 تەڭگە تۇرادى. بۇعان دەيىن بۇل قىزمەتتىڭ قۇنى 51 900 تەڭگەگە جەتكەن ەدى.
نوتاريالدىق تاريفتەرگە قاتىستى وزگەرىستى ادىلەت مينيسترلىگى ەنگىزدى. جەڭىلدەتىلگەن تاريف تۇرعىن ءۇي يپوتەكالىق نەسيە ەسەبىنەن ساتىپ الىنعان جاعدايدا قولدانىلادى.
2026 جىلعى 1 قاڭتاردان باستاپ نوتاريالدىق تاريفتەر تۋرالى بۇيرىق كۇشىنە ەنگەن. قۇجاتتا 4 اەك تەك يپوتەكالىق قارىز شارتىنا قاتىستى كورسەتىلگەندىكتەن، كەيبىر نوتاريۋستار ستاندارتتى 12 اەك الۋدى جالعاستىرعان. كەيىن مينيسترلىك تۇسىندىرگەن سوڭ جەڭىلدەتىلگەن تاريف رەسمي تۇردە بەكىتىلدى.
نوتاريۋستا كەلىسىمدى راسىمدەۋ قۇنى تاراپتاردىڭ مارتەبەسىنە قاراي ءارتۇرلى بولدى. ساتىپ الۋشى مەن ساتۋشى تۋىس بولماسا، قىزمەت قۇنى - 12 اەك نەمەسە 51 900 تەڭگە. جاقىن تۋىستار اراسىندا جاسالعان مامىلە ءۇشىن 7 اەك، ياعني 30 275 تەڭگە الىندى. ال تاراپتاردىڭ ءبىرى زاڭدى تۇلعا بولسا، تاريف - 17 اەك نەمەسە 73 525 تەڭگە.
